هڪ سياسي پارٽي شنگهائي سهڪار تنظيم کي ڇيهو رسائڻ جي ڪوشش ۾ مصروف آهي:اسحاق ڊار

نائب وزيراعظم ۽ پرڏيهي وزير اسحاق ڊار چيو آهي ته هڪ سياسي پارٽي شنگهائي سهڪار تنظيم کي ڇيهو رسائڻ جي ڪوشش ۾ مصروف آهي. اسلام آباد ۾ ايس سي او سربراهي ڪانفرنس جي انتظامن جو جائزو وٺڻ لاءِ ريلي جو بندوبست ڪيو ويو، جنهن جي اسحاق ڊار ۽ عطا تارڙ اڳواڻي ڪئي. اسحاق ڊار ميڊيا سان ڳالهائيندي چيو ته پاڪستان ايس سي او سربراهي اجلاس ۾ شرڪت ڪندڙن جي آجيان ڪرڻ لاءِ تيار آهي، جنهن ۾ ميمبر ۽ مبصرملڪن جا سربراهه شرڪت ڪندا ۽ ڀارت جو پرڏيهي وزير به شريڪ ٿيندو. هن چيو ته شاندار ميزباني جي ذميواري سٺي نموني سان نڀائي ويندي، ڪيترن ئي ورهين کانپوءِ پاڪستان وڏي عالمي ايونٽ جي ميزباني ڪري رهيو آهي. سندس چوڻ هو ته چين جو وزيراعظم پاڪستان جو ٻه طرفه دورو ڪندو، جڏهن ته ڀارت جي پرڏيهي وزير جي ملاقات بابت ڪا به درخواست ناهي ملي. نائب وزيراعظم چيو ته ايس سي او سيڪريٽري جنرل ميڊيا کي ڪانفرنس جي باري ۾ آگاهي ڏيندو، اطلاعات ۽ پرڏيهي وزارت سميت سمورا اسٽيڪ هولڊرز پنهنجا فرض سرانجام ڏيندا، سمورن ادارن ۽ کاتن گڏيل سهڪار جا بهترين انتظام ڪيا آهن. پرڏيهي وزير جو چوڻ هو ته هڪ سياسي پارٽي 2014ع ۾ چيني وزيراعظم جي دوري جي موقعي تي ڌرڻو هنيو هو ۽ هاڻي احتجاج جو سڏ ڏئي ايس سي او کي ڇيهو رسائڻ جي ڪوشش ۾ مصروف آهي، قومي اهميت جي ايونٽ جي موقعي تي احتجاج سٺو پيغام ناهي. اسحاق ڊار چيو ته اهم موقعن تي احتجاج هڪ سياسي پارٽي جي عادت آهي، ان کي پنهنجي غلطي درست ڪرڻ گهرجي.