وزيراعظم شهباز شريف جي فرانسيسي صدر سان ملاقات

وزيراعظم شهباز شريف فرانس جي صدر ايمانوئل ميڪرون سان ملاقات ڪئي. وزيراعظم جي صدر ميڪرون سان ملاقات سعودي عرب جي راڄڌاني رياض ۾ ون واٽر سربراهي اجلاس جي موقعي تي ٿي. وزيراعظم رياض ۾ ون واٽر سمٽ جي ڪامياب گڏيل ميزباني تي صدر ميڪرون کي مبارڪباد ڏني ۽ موسمياتي تبديلي ۽ ترقياتي معاملن تي فرانس جي ڪردار کي ساراهيو. ملاقات ۾ پاڪستان ۽ فرانس وچ ۾ زراعت، لائيو اسٽاڪ، انفارميشن ٽيڪنالاجي، پيشيواراڻي مهارتن ۾ ترقي ۽ پيئڻ جي صاف پاڻي جي شعبن۾ بزنس ٽو بزنس رابطن ذريعي سهڪار وڌائڻ تي اتفاق ڪيو. ٻنهي اڳواڻن پاڪستان فرانس لاڳاپن جي مثبت رخ تي اطمينان جو اظهار ڪندي مختلف شعبن ۽ سيڙپڪاري سان گڏوگڏ گڏيل قومن سميت گهڻ رخي فورمز تي تعاون تي خيالن جي ڏي وٺ ڪئي. وزيراعظم فرانس کي پاڪستان ۾ سيڙپڪاري جي موقعن مان فائدو کڻڻ جي دعوت پڻ ڏني. ٻنهي اڳواڻن علائقائي ۽ عالمي مسئلن جي حوالي سان رابطن وڌائڻ جي عزم جو پڻ ورجاءُ ڪيو..