پاڪستاني نوجوان سان محبت ۾ آمريڪا کان ڪراچي آيل عورت اونيجا اينڊريو رابنسن چئن مهينن کانپوءِ واپس وطن رواني ٿي ويئي

پاڪستاني نوجوان سان محبت ۾ آمريڪا کان ڪراچي آيل عورت اونيجا اينڊريو رابنسن چئن مهينن کانپوءِ واپس وطن رواني ٿي ويئي. آمريڪي  عورت غير ملڪي ايئر لائن جي اڏام اِي ڪي 603 ذريعي دبئي رواني ٿي ويئي، جتان هوءَ آمريڪا  ويندي. نيويارڪ جي رهواسڻ اونيجا اينڊريو رابنسن 11 آڪٽوبر تي نوجوان جي محبت ۾ پاڪستان جي هڪ مهيني جي سياحتي ويزا تي ڪراچي آئي هئي، ويزا ختم ٿيڻ تي عورت کي 10 نومبر تائين ڪراچي  مان وڃڻو هو پر هوءَ واپس نه وئي ۽ ڪيترائي مهينا ڪراچي ۾ دربدر رهي. آمريڪي عورت گارڊن ۾ مبينا  دوست جي گهر ٻاهران  پهتي ۽ ڪجهه ڏينهن اُتي رهڻ بعد هڪ فلاحي اداري کيس پناهه ڏني، جنهن دوران سندس طبيعت خراب ٿيڻ تي کيس جناح اسپتال جي  خاص وارڊ ۾ داخل ڪيو ويو، جتي عورت کي باءِ پولر ڊس آرڊر جي تشخيص ٿي. جناح اسپتال ۾ علاج بعد آمريڪي  عورت کي جمعي جي شام سفر لاءِ فٽ قرار ڏيئي اسپتال مان ڊسچارج ڪيو ويو. اونيجا کي او پي  ڊي جون ريگولر دوائون ڏيئي پوليس جي تحويل ۾ اسپتال کان ڪراچي ايئرپورٽ روانو ڪيو ويو. ان کان اڳ آمريڪي قونصليٽ جي عملي اونيجا جي اسپتال ۾ عيادت دوران کيس وطن واپسي تي راضي ڪيو ۽ آمريڪي قونصل خاني طرفان ئي عورت لاءِ ٽڪيٽ جو بندوبست ڪيو ويو.