پاڪستان پاران ايندڙ ٻن ڏينهن دوران هوائي حدون بند رکڻ جو فيصلو

پاڪستان ايندڙ ٻن ڏينهن دوران مختلف وقتن تي پنهنجون هوائي حدون بند رکڻ جو فيصلو ڪيو آهي. پاڪستان ايئرپورٽ اٿارٽي ان سلسلي ۾ سمورين ايئر لائنن ۽ ايوي ايشن ڪمپنين کي نوٽم به جاري ڪري ڇڏيو. نوٽم موجب، 28 ۽ 29 آڪٽوبر تي هوائي حدون صبح 6 کان 9 وڳي تائين بند رهنديون، ان دوران ڪمرشل اڏامن کي احتياط ڪرڻ جي هدايت ڪئي وئي آهي، ٻن ڏينهن دوران 3، 3 ڪلاڪ حدون بند رهنديون. نوٽم ۾ چيو ويو آهي ته ڪراچي ۽ لاهور فلائٽ ريجن ۾ مخصوص روٽس ڪمرشل اڏامن لاءِ بند رهندا. ذريعن جو چوڻ آهي ته اهو فيصلو امڪاني طور پاڪستان جي سرحد ويجهو ڀارتي فوجي مشقن کي نظر ۾ رکندي ڪيو ويو آهي.