- Advertisement -
سنڌ جي سينيئر وزير شرجيل انعام ميمڻ چيو آهي ته پيپلز گرين ٽرانسپورٽ منصوبي تحت ڪراچي ۽ حيدرآباد ۾ 500 اليڪٽرڪ بسون مرحليوار متعارف ڪرايون وينديون، هي فليگ شپ منصوبو هوندو، شهرين کي آرام ۽ گهٽ لاڳت جي سفري سهولت ملندي، فضائي گدلاڻ ۾ گهٽتائي ايندي.
جاري ڪيل بيان ۾ شرجيل انعام ميمڻ چيو ته منصوبي ۾ جديد بس ڊپو، چارجنگ اسٽيشن، آٽو ميٽڪ ڀاڙي جي وصولي ۽ سمارٽ مانيٽرنگ سسٽم شامل هوندو.
سندس چوڻ هو ته ڪراچي پورٽ کان قيوم آباد ايليويٽڊ ايڪسپريس وي منصوبي جي به منظوري ڏني وئي آهي جيڪو بندرگاهه کان وڏن گاڏين لاءِ مخصوص رستو فراهم ڪندو.
سنڌ جي سينيئر وزير چيو ته 16 ڏهائي 5 ڪلو ميٽر ڊگهي فريٽ ايڪسپريس وي پورٽ کي سينيٽر تاج حيدر انٽر چينج سان ڳنڍيندو، جنهن سان شهري روڊن تي ٽريفڪ جو دٻاءُ گهٽ ٿيندو ۽ بندرگاهه جي ڪارڪردگي ۾ بهتري ايندي.
شرجيل انعام ميمڻ چيو ته ڄامشوري ۽ مٽياري ۾ 41 هزار ايڪڙ تي ٻيلو لڳائڻ جو منصوبو ماحولياتي تحفظ ۽ ڪاربن جي خارج ٿيڻ ۾ گهٽتائي طرف اهم قدم آهي.
هن چيو ته سنڌ سرڪار زراعت ۽ فوڊ پروسيسنگ شعبي ۾ به خانگي ڀائيواري کي هٿي ڏئي رهي آهي.
سنڌ جي سينيئر وزير چيو ته ٺٽي ۾ ٽماٽر ڪلسٽر پراسيسنگ پلانٽ ۽ سڄي صوبي ۾ چانور ۽ ڪڻڪ ميڪانائزيشن منصوبي تي فزيبلٽي اسٽڊيز جديد زرعي ٽيڪنالاجي جي استعمال تي حڪومتي ڌيان جو ثبوت آهي.
شرجيل انعام ميمڻ چيو ته پبلڪ پرائيويٽ پارٽنر شپ ماڊل تحت صوبي ۾ ٽرانسپورٽ، توانائي، ماحولياتي ۽ انفرا اسٽڪچر جي شعبن ۾ ڪيترائي اهم منصوبا شروع ڪيا پيا وڃن.
سندس چوڻ هو ته پبلڪ پرائيويٽ پارٽنرشپ جا منصوبا شهري سهولتن ۾ بهتري، روزگار جا موقعا، سيڙپڪاري کي هٿي ۽ ٽيڪنالاجي جي استعمال ۾ اضافي جو سبب بڻجي رهيا آهن.
سنڌ جي سينيئر وزير چيو ته پبلڪ پرائيويٽ پارٽنرشپ تحت جاري منصوبا سنڌ جي عوام لاءِ هڪ بهتر، خوشحال ۽ جديد مستقبل جو بنياد رکي رهيا آهن.
شرجيل انعام ميمڻ چيو ته پ پ جي سنڌ حڪومت عوامي خدمت، ترقي ۽ پاڻ تي ڀاڙڻ جي ويزن تي عمل ڪري رهي آهي.- Advertisement -
