ڄامشورو ضلعي جي مختلف ٿاڻن جي پوليس پاران منشيات وڪرو ڪندڙن خلاف ڪريڪ ڊائون جاري

ڄامشورو ضلعي جي مختلف ٿاڻن جي پوليس پاران منشيات وڪرو ڪندڙن خلاف ڪريڪ ڊائون جاري آهي، جڏهن ته ستن منشيات وڪرو ڪندڙن کي گرفتار ڪري منشيات ۽ هٿيار هٿ ڪري ڌار ڌار ڪيس داخل ڪيا ويا. ڊي ايس پي ڪوٽڙي شاهنواز جوکيو جي اڳواڻي ۾ پوليس، ڪوٽڙي سائيٽ، ڄامشوري، ڪوٽڙي سٽي ۽ ٻڍاپور واري علائقي ۾ منشيات وڪرو ڪندڙن خلاف ڪارروايون ڪيون. پوليس ڪاررواين دوران شروع ڪندي ستن منشيات وڪرو ڪندڙن کي گرفتار ڪري ورتو. پوليس جو چوڻ آهي ته گرفتار جوابدارن ۾ ريحان علي برفت، نثار جانوري، عباس انصاري، روشن انصاري، سهيل ٻٻر، ابرار جتوئي ۽ ٻيا شامل آهن. پوليس موجب، گرفتار جوابدارن وٽان ساڍا پنج ڪلو چرس، آئيس، مين پڙي، نشي واريون سوپاريون ۽ هڪ پسٽل هٿ ڪري ڌار ڌار ڪيس داخل ڪيا ويا. ايس ايس پي ڄامشورو محمد ظفر صديق ڇانگا جو چوڻ آهي ته آءِ جي سنڌ ۽ ڊي آءِ جي حيدرآباد جي خاص هدايت تي ضلعي ۾ منشيات وڪرو ڪندڙن ۽ ڏوهارين خلاف ڪريڪ ڊائون جاري آهي، ضلعي مان منشيات جو مڪمل خاتمو آڻي، سک جو ساھه کڻندا.