ڌرڻن جي سياست ملڪ کي نقصان پهچايو آهي: نثار کهڙو

پ پ سنڌ جي صدر نثار کهڙي چيو آهي ته ڌرڻن جي سياست ملڪ کي نقصان پهچايو آهي، جي ڊي اي، جي يو آءِ، پي ٽي آءِ ۽ جماعت اسلامي ڌرڻا هڻي وقت ضايع نه ڪري ۽ ايندڙ چونڊن جو انتظار ڪري. سنڌ اسيمبليءَ ٻاهران ميڊيا سان ڳالهائيندي نثار کهڙي چيو ته پيپلز پارٽي جو مينڊيٽ فارم 45 تي ٻڌل آهي، مينڊيٽ تي اعتراض ڪندڙ  ۽ ڌانڌلي جا الزام لڳائيندڙ عدالتن ۾ ثبوت پيش ڪن. سندس چوڻ هو ته احتجاج ڪندڙ عوام جي توهين ڪري رهيا آهن، جن پارٽين کي عوام رد ڪيو آهي ته ڌرڻا هڻي عوام جي توهين نه ڪن. پ پ سنڌ جي صدر نثار کهڙي چيو ته جيڪي ماڻهو پيپلزپارٽي جي مينڊيٽ کان خوش ناهن، اصل ۾ اهي عوام کان خوش ناهن، پ پ مخالف پارٽين جا ڌرڻا ۽ احتجاج بنا جواز آهن، ڌرڻن جي سياست ۽ ڏڦيڙ ملڪ توڙي سياست کي ڪمزور ڪندا. هن چيو ته ڌرڻا هڻڻ سان عوام جي زندگي متاثر ٿيندي آهي، سنڌ اسيمبليءَ پاڪستان ٺاهيو ۽ سنڌ اسيمبلي پاڪستان بچائڻ لاءِ ڪردار ادا ڪندي. پ پ سنڌ جي صدر چيو ته پهريان به هي پارٽيون اتحاد ٺاهڻ باوجود 5 کان 6 سيٽون کٽي سگهيون، جي يو آءِ ته سنڌ ۾ ڪڏهن ڪاميابي حاصل ئي ناهي ڪئي، وڏو پير پاڳارو به چونڊن ۾ هاريندو رهندو هو. نثار کهڙي چيو ته سڄي ملڪ ۾ جمهوري حڪومتون وجود ۾ اچي رهيون آهن، پارليامينٽ ۽ اسيمبليون وجود ۾ هونديون ته جمهوريت لاڳو ٿيندي، جمهوريت ئي مسئلن جو حل آهي. پ پ سنڌ جي صدر چيو ته حافظ نعيم الرحمان سنڌ اسيمبلي جي ميمبر جو قسم کڻڻ چاهي ٿو ته اچي قسم کڻي ۽ ڌرڻن بدران اسيمبلي ۾ آواز اٿاري. نثار کهڙي چيو ته وفاق ۾ ڪابه پارٽي اڪيلي حڪومت نٿي ٺاهي سگهي، جنهن سبب پيپلزپارٽي ڪردار ادا ڪيو ته جيئن ٻيهر چونڊون نه ٿين، ملڪ ۾ جمهوري حڪومتون پنهنجو آئيني مدو پورو ڪنديون