گڏيل قومن ۽ يورپي يونين پاران پاڪ ايران ڇڪتاڻ تي ڳڻتي جو اظهار

گڏيل قومن ۽ يورپي يونين، پاڪ ايران ڇڪتاڻ تي ڳڻتي جو اظهار ڪيو آهي. گڏيل قومن جي سيڪريٽري جنرل انتونيو گوتريس جو چوڻ آهي ته سلامتي جي سمورن خدشن کي ڳالهين ذريعي حل ڪرڻ گهرجي. سندس چوڻ هو ته پاڪستان ۽ ايران صبر جو مظاهرو ڪن ته جيئن ڇڪتاڻ ۾ وڌيڪ اضافو نه ٿئي. گڏيل قومن جي سيڪريٽري جنرل انتونيو گوتريس چيو ته ٻئي ملڪ خودمختاري، علاقائي سلامتي ۽ سٺي پاڙيسري لاڳاپن جي اصولن تحت مسئلا حل ڪن. يورپي يونين جي ترجمان جو چوڻ آهي ته پاڪستان، عراق ۽ ايران ۾ ٿيل حملا يورپي يونين لاءِ ڳڻتي جوڳا آهن. هن چيو ته حملن سان ملڪن جي علاقائي سلامتي ۽ خودمختاري جي ڀڃڪڙي ٿي آهي. يورپي يونين جي ترجمان چيو ته حملن سان خطي ۾ عدم استحڪام جا اثر پيدا ٿيا آهن.