مونجهارا پيدا ڪندڙ عدالتي فيصلا ملڪ ۽ قوم جي مفاد ۾ ناهن، عدالتي فيصلا اهڙا هجڻ گهرجن: راڻا ثناءُ الله

وزيراعظم جي صلاحڪار راڻا ثناءُ الله سپريم ڪورٽ جي فيصلي خلاف نظرثاني اپيل جو اشارو ڏيندي چيو آهي ته مونجهارا پيدا ڪندڙ عدالتي فيصلا ملڪ ۽ قوم جي مفاد ۾ ناهن، عدالتي فيصلا اهڙا هجڻ گهرجن، جيڪي عام ماڻهوءَ کي سمجهه ۾ اچن، فيصلي تي نظر ثاني ٿيڻ گهرجي، هاڻي هڪ نئون فيصلو تحريڪ انصاف جي حق ۾ اچي ويو، ججن آئين جي تحفظ جو قسم کنيو آهي، سپريم ڪورٽ جو فيصلو آئين ٻيهر لکڻ برابر  آهي. اسلام آباد ۾ پريس ڪانفرنس ڪندي راڻا ثناءُ الله چيو ته مونجهارا پيدا ڪندڙ عدالتي فيصلا ملڪ ۽  قوم جي مفاد ۾ ناهن هوندا، بنا گهرڻ انصاف ڏنو وڃي ته اهڙن فيصلن سان اثر افسوسناڪ هوندا آهن، عدالت جو فيصلو انصاف تي ٻڌل هجڻ گهرجي. هن چيو ته اليڪشن ڪميشن سني اتحاد ڪائونسل جي مخصوص سيٽن جي مطالبي کي رد ڪيو، پوءِ  هنن پشاور هائيڪورٽ سان رابطو ڪيو، پر  اتان مطالبو رد ٿيو، سپريم ڪورٽ جو فيصلو به سني اتحاد ڪائونسل جي حق ۾ ناهي آيو. راڻا ثناءُ الله چيو ته آزاد ميمبرن کي تحريڪ انصاف جو ميمبر چيو ويو، سني اتحاد ڪائونسل جي درخواست تسليم نه خارج ٿي، هاڻي هڪ نئون فيصلو تحريڪ انصاف جي حق ۾ اچي ويو، ججن آئين جي تحفظ جو قسم کنيو آهي، سپريم ڪورٽ جو فيصلو آئين ٻيهر لکڻ برابر  آهي. وزيراعظم جي صلاحڪار چيو ته عدالت جو احترام آهي، سپريم ڪورٽ جي فيصلي خلاف نظرثاني اپيل ته داخل ٿيڻ گهرجي، هي فيصلو آئين ۽ قانون جون گهرجون پوريون نه ٿو ڪري. راڻا ثناءُ الله چيو ته پي ٽي آءِ بانيءَ کي جيل کان ٻاهر اچڻ جو حق آهي، کين به پورو حق آهي ته کيس اتي رکڻ جي پوري ڪوشش ڪن، جيڪڏهن پي ٽي آءِ باني ٻاهر اچي ويو ته ڪو طوفان نه ايندو. هن چيو ته فارم 45 ۽ فارم 47 وارو قصو اليڪشن ڪميشن ۾ ثابت ڪري  ته ٻيهر اليڪشن ٿي ويندي.