سوڀوديرو ويجهو هٿياربندن جو گهر تي حملو ,هڪ ڄڻو قتل، 2 نوجوان زخمي

سوڀوديرو ويجهو هٿياربندن گهر تي حملو ڪري هڪ ڄڻي کي قتل ڪري ڇڏيو، جڏهن ته 2 نوجوان زخمي ٿي پيا. ڳوٺ خاڪي ڀيلار ڀرسان 7 ھٿياربندن گهر تي حملو ڪري 40 ورهين جي اميرزادو رند کي قتل ڪري ڇڏيو، جڏهن ته سندس 2 نوجوان پٽ شھمير ۽ رشيد رند سخت زخمي ٿي پيا. مقتول جو لاش ۽ زخمين کي رورل هيلٿ سينٽر منتقل ڪيو ويو. مقتول جي ڀاءُ اربيلي رند صحافين کي ٻڌايو ته هو جيڪب آباد جا رهواسي آهن، سندس ڀاءُ ٽي سال اڳ شھدادڪوٽ واسڻ سويرا ڌي شاھن چانڊيو سان عدالت ۾ پسند جو پرڻو ڪيو، جنهن تان جوابدارن گذريل رات دير سان حملو ڪري سندس ڀاءُ کي قتل ڪيو. هن الزام هنيو ته نصرالله چانڊيو، ھمت، امير، ضمير، عنايت، ظفر ۽ رحمان چانڊيو حملو ڪري ڀاءُ اميرزادو رند کي قتل ڪيو آهي. سندس چوڻ هو ته حملي بابت ايس ايڇ او غلام شبير کھڙو کي اطلاع ڏنو ويو،  جنھن ڪابه مدد نه ڪئي ۽ نه ئي واقعي واري ھنڌ آيو، هنن پاڻمرادو مقتول جو لاش ۽ زخمين کي کڻائي گمس اسپتال منتقل ڪيو. اربيلو رند چيو ته ڀاءُ جو پوسٽ مارٽم ڪرائڻ لاءِ ڪيترائي ڀيرا ٿاڻي جا چڪر ڪاٽيا پر ليٽر نه ڏنو ويو، پوليس 9 ڪلاڪن بعد اسپتال پهتي. مقتول جي وارثن اعليٰ اختيارين کان گھر ڪئي ته قاتل گرفتار ڪري پوليس جي نااھلي جو نوٽيس وٺي انصاف ڪيو وڃي.