ڪراچي نه پر  ايم ڪيو ايم لاوارث بڻجي چڪي آهي ۽ عوام ايم ڪيو ايم کي ٿڏي ڇڏيو آهي : سميتا افضال

سنڌ حڪومت جي ترجمان سميتا افضال چيو آهي ته ڪراچي نه پر  ايم ڪيو ايم لاوارث بڻجي چڪي آهي ۽ عوام ايم ڪيو ايم کي ٿڏي ڇڏيو آهي. ايم ڪيو ايم اڳواڻ فاروق ستار جي ڏنل بيان جي رد عمل ۾ سميتا افضال چيو ته ڪراچي جا شهري سڀ ڄاڻين ٿا ته اهي اڻڄاتل ماڻهو ڪير هئا جن شهر کي تباهه ڪيو. سندس چوڻ هو ته دهشتگردي، ٻوري بند لاش ۽ ڀتا خوري جي سياست ڪندڙ پنهنجي ڳچيءَ ۾ جهاتي پائي ڏسن. هن چيو ته ايم ڪيو ايم هزارين بيگناهه ماڻهن جو خون وهايو، کين پنهنجي ڪردار تي ڪراچي جي ماڻهن کان معافي وٺڻ گهرجي. ترجمان چيو ته سنڌ حڪومت ڊمپر حادثن خلاف سخت ڪارروائي ڪئي آهي ۽ حادثن کي روڪڻ لاءِ قدم کنيا پيا وڃن. سميتا افضل چيو ڪراچي ۾ هن وقت بي مثال ترقياتي ڪم ۽ عوامي منصوبا جاري آهن، ڪراچي جي ماڻهن ۽ واپارين سنڌ حڪومت تي مڪمل اعتماد جو اظهار ڪيو آهي. سندس چوڻ هو ته مڪاني چونڊن ۾ پ پ جي ميئر جي فتح پڻ شهرين جو اعتماد ظاهر ڪري ٿي، مڪاني چونڊن ۾ ايم ڪيو ايم ان ڪري فرار ٿي ڇاڪاڻ ته کين پنهنجي انجام جي خبر هئي. سميتا افضال چيو ته ڪراچي جي ماڻهن پاران رد ڪيل رٽائرڊ سياستدانن کي هاڻي ڪٿي ويهي الله الله ڪرڻ گهرجي.