اجلاس طلب نه ڪرڻ سان صدر عارف علوي جي ساک کي نقصان پهچي رهيو آهي : شيري رحمان

پ پ سينيٽر شيري رحمان چيو آهي ته آئين ۾ واضح آهي ته صدر کي هر صورت ۾ اجلاس طلب ڪرڻو آهي، اجلاس طلب نه ڪرڻ سان صدر عارف علوي جي ساک کي نقصان پهچي رهيو آهي، اجلاس طلب ڪرڻ جو فيصلو مخصوص سيٽن بابت فيصلي سان مشروط ڪرڻ افسوس جوڳو عمل آهي. اسلام آباد ۾ ميڊيا سان ڳالهائيندي  شيري رحمان چيو ته پارلياماني معاملن واري وزير ڪجهه ڏينهن اڳ صدر عارف علوي کي قومي اسيمبليءَ جو اجلاس گهرائڻ لاءِ سمري اماڻي هئي. سندس چوڻ هو ته صدر عارف علوي اڃا تائين سمري تي صحي ناهي ڪئي، صدر طرفان اجلاس طلب ڪرڻ جو فيصلو مخصوص سيٽن بابت فيصلي سان مشروط ڪرڻ افسوس جوڳو عمل آهي. پ پ سينيٽر شيري رحمان چيو ته صدر عارف علوي جو دورو پهريان ئي تڪرارن جو شڪار رهيو آهي، وڃڻ کان اڳ به هو صدارتي نه تحريڪ انصاف جي قسم جي پاسداري ڪري رهيو آهي. هن چيو ته آئين جي آرٽيڪل 91 جي شق 2 تحت اليڪشن بعد 21 ڏينهن تائين اجلاس لازمي گهرائڻو آهي، آئين ۾  اجلاس کي ڪنهن رولڙي جو شڪار معاملي سان مشروط نه ڪيو وڃي. پ پ سينيٽر شيري رحمان چيو ته صدر عارف علوي هميشه آئيني بحران پيدا ڪرڻ جي ڪوشش ڪئي آهي، کيس وڃڻ کان اڳ اهڙي ڪنهن به غير آئيني قدم کان پاسو ڪرڻ گهرجي.