او آءِ سي پاران غزه ۾ جاني نقصان روڪڻ لاءِ غير مشروط جنگبندي جو مطالبو

ترڪي ۾ اسلامي تعاون تنظيم (او آءِ سي) جي اطلاعات واري وزيرن جي اجلاس دوران غزه ۾ غير مشروط جنگبندي جو مطالبو ڪيو ويو آهي. او آءِ سي جو چوڻ آهي ته اجلاس غزه ۽ ويسٽ بئنڪ ۾ اسرائيلي فوج پاران فلسطينين جي منظم قتل عام ۽ نسل ڪشي جي سخت مذمت ڪري ٿو ۽ غزه ۾ غير مشروط جنگ بندي جو مطالبو ڪن ٿا. اجلاس ۾ چيو ويو ته غزه ۽ ويسٽ بئنڪ ۾ فلسطينين جي نسل ڪشي ۽ قتل عام جي اسرائيل جي منظم مهم انتهائي مذمت جوڳي آهي، اسرائيل پنهنجي بزدلاڻي ڪاررواين کي لڪائڻ لاءِ غلط ڄاڻ پکيڙي رهيو آهي. او آءِ سي جو چوڻ آهي ته اوڀر يروشلم سان گڏ فلسطيني رياست جو قيام ۽ فلسطيني حقن کي تسليم ڪرڻ ئي خطي ۾ امن جو واحد رستو آهي. او آءِ سي جي اجلاس ۾ حق جي آواز کي دٻائڻ لاءِ فلسطيني صحافين کي نشانو بڻائڻ جي به مذمت ڪئي وئي.