تنگواڻي ۽ ڀرپاسي ۾ بدامني تي ضابطو نه اچي سگھيو آهي، هٿياربند وڌيڪ ٻن ڄڻن کي اغوا ڪري ويا، وارثن پاران احتجاجي مظاهرو ڪري ڌرڻو هنيو ويو.
ڊيرا سرڪي ٿاڻي جي حد مان ٺل-تنگواڻي لنڪ روڊ تان هٿياربند هٿيارن جي زور تي سوئي گئس وال جي ٻن چوڪيدارن حمز علي گجراڻي ۽ منير گجراڻي کي اغوا ڪري ويا.
وارثن پاران سبحان گجراڻي، محمد صديق گجراڻي ۽ ٻين جي اڳواڻيءَ ۾ سوڪڙ اسٽاپ وٽ احتجاجي مظاهرو ڪري ڌرڻو هنيو ويو.
ڌرڻي سبب مختلف شهرن ڏانهن ايندڙ ويندڙ ٽريفڪ معطل ٿي وئي.
احتجاج ڪندڙن ميڊيا سان ڳالهائيندي چيو ته ڪشمور ضلعي ۾ ڌاڙيلن جو راڄ آهي، هتي ڪير به محفوظ ناهي.
هنن چيو ته هٿياربند هٿيارن جي زور تي سوئي گئس وال جي ٻن چوڪيدارن حمز علي گجراڻي ۽ منير گجراڻي کي اغوا ڪري ويا آهن.
سندن چوڻ هو ته هو غريب مسڪين ماڻهو آهن ڪنهن سان دشمني ناهي.
احتجاج ڪندڙن اعليٰ اختيارين کان مطالبو ڪيو ته ٻنهي مغوين کي بازياب ڪرائي بيچيني ختم ڪئي وڃي.
