حڪومت تحريڪ انصاف جي جلسي کي ناڪام ۽ وسيلن جو زيان قرار ڏئي ڇڏيو:عطا تارڙ

حڪومت تحريڪ انصاف جي جلسي کي ناڪام ۽ وسيلن جو زيان قرار ڏئي ڇڏيو. اسلام آباد ۾ وفاقي وزير انجنيئر امير مقام سان گڏ پريس ڪانفرنس ڪندي سڌ سماءَ واري وفاقي وزير عطا تارڙ چيو ته  علي امين گنڊا پور وٽ رڳو ڌمڪيون ڏيڻ کانسواءِ ڪجهه به ناهي، ڪي پي ۾ 12 سالن دوران هڪ به منصوبو شروع نه ڪيو ويو آهي. سندس چوڻ هو ته تحريڪ انصاف ڪي پي ۾ 12 سالن جي اقتدار ۾ هڪ به معياري منصوبو ناهي جوڙيو، هو پختونن جي دل سان عزت ڪندا آهن، پختونن جي روايت جي ابتڙ عورتن خلاف ڪريل ٻولي استعمال ڪئي وئي. سڌ سماءَ واري وفاقي وزير عطا تارڙ چيو ته جلسي گاهه کي ڀرڻ لاءِ سرڪاري وسيلن ۽ مشينري جو استعمال ڪيو ويو، ڪي پي ۾ انڌير نگري ۽ چرٻٽ راجا وارو قانون آهي، جيڪو روٽ ڏنو وي هو اهو کليل هو، انتظاميا ڪابه رنڊڪ نه وڌي. هن چيو ته ناڪام جلسي جي ڪاوڙ مريم نواز ۽ ادارن مان ڪڍي وئي، تحريڪ انصاف هڪ فارن فنڊڊ پارٽي آهي، پي ٽي آءِ باني يهودي لابي جو حصو آهي، تحريڪ انصاف کي گارگند ۽ تشدد کانسواءِ ڪجهه ناهي ايندو. سڌ سماءَ واري وفاقي وزير عطا تارڙ چيو ته نواز شريف ملڪ ۾ ترقياتي منصوبن جو ڄار وڇايو، هاڻي به وقت آهي تحريڪ انصاف پاڻ سنڀالي ۽ صوبي جي خدمت ڪري، منافقت جي سياست پي ٽي آءِ جي عادت آهي، تحريڪ انصاف اندر ڏڦيڙ ئي ڏڦير آهي، پي ٽي آءِ جو ناڪام جلسو سڄي قوم ڏٺو. وفاقي وزير انجنيئر امير مقام چيو ته علي امين گنڊا پور جي ڪرپشن جا سندس وزير شاهد آهن، جلسي ۾ سرڪاري وسيلن جي استعمال جي جاچ ٿيڻ گهرجي، عوام تحريڪ انصاف جي جلسي کي رد ڪري ڇڏيو. سندس چوڻ هو ته پختون عورتن بابت سٺي روايت رکن ٿا، جلسي ۾ مريم نواز بابت ساک کي نقصان پهچائڻ وارا لفظ استعمال ڪيا ويا، پي ٽي آءِ جلسي ۾ عورتن بابت جيڪي لفظ استعمال ڪيا ويا انهن جي مذمت ڪجي ٿي. وفاقي وزير انجنيئر امير مقام چيو ته تحريڪ انصاف جو جلسو ڀڀڪين ۽ ادارن کي ڌمڪيون ڏيڻ کانسواءِ ڪجهه به نه هو، علي امين گنڊاپور صبح شام بيان تبديل ڪندڙ شخص آھي.