غزه ۾ اسرائيلي بمباري ۾ وڌيڪ 190 فلسطيني شهيد، 340 زخمي

اسرائيلي فوج جا غزه ۾ هٿين خالي فسلطينين تي ظلم جاري آهي، گذريل 24 ڪلاڪن دوران يهودي فوج جي حملن ۾ وڌيڪ 190 فلسطيني شهيد ۽ 340 کي زخمي ڪيو ويو. فلسطيني صحت واري وزارت جو چوڻ آهي ته 7 آڪٽوبر کان هن وقت تائين اسرائيلي حملن ۾25 هزار 295 فلسطيني شهيد ۽ 63 هزار کان وڌيڪ زخمي ٿي چڪا آهن. فلسطيني صحت واري وزارت موجب، شهيدن ۾ 11 هزار ٻار ۽ ساڍا 7 هزار عورتون شامل آهن ان سان گڏ طبي عملي جا 377 اهلڪار، 45 فائر برگيڊ ڪارڪن ۽ 110 صحافي به يهودي فوج جي حملي ۾ جانيون وڃايون آهن. ٻئي پاسي عرب ميڊيا جو چوڻ آهي ته خان يونس ۾ اسرائيلي فوج اسپتالن، ايمبولنسز ۽ اسڪولي عمارتن کي نشانو بڻايو آهي جنهن دوران اسڪولي عمارت ۾ پناهه وٺندڙ ڪيترائي فلسطيني شهيد ٿيڻ جا اطلاع آهن.