ڊي ايس پي جي شهادت رنگ لائيندي، ڪراچي ۾ امن پوليس جي قربانين جو نتيجو آهي: ضياءَ الحسن لنجار

سنڌ جي گهرو وزير ضياءَ الحسن لنجار چيو آهي ته ڊي ايس پي جي شهادت رنگ لائيندي، ڪراچي ۾ امن پوليس جي قربانين جو نتيجو آهي، ڪراچي جو عوام پوليس سان ڪلهو ڪلهي ۾ ملائي بيٺل آهي، ڪچي ۾ ڌاڙيلن کي ختم ڪيو پيو وڃي، ٽن هندو نوجوانن کي بازياب ڪرايو ويو آهي، نينگري پريا ڪماري بابت جلد سٺي خبر ملندي، محرم الحرام دوران خدشا هوندا آهن. ڪراچيءَ ۾ ميڊيا سان ڳالهائيندي ضياءَ الحسن لنجار چيو ته علي رضا گهڻي وقت کان سي ٽي ڊي ۾ ڪم ڪري رهيو هو، پهرين محرم الحرام تي هي واقعو پيش آيو آهي، ان کي سيڪٽريل ڪلنگ طور ڏٺو پيو وڃي. سندس چوڻ هو ته علي رضا لياري جي ڏوهاري ٽولي ۽ ٽي ٽي پي خلاف ڪارروايون ڪيون، لياري جي ڏوهاري ٽولي جي پراڻي دشمني ٿي سگهي ٿي. سنڌ جي گهرو وزير ضياءَ الحسن لنجار چيو ته علي رضا جي قتل ۾ جيڪي به ڪردار آهن، انجام تائين پهچندا، ڊي ايس پي جي شهادت رنگ لائيندي، پوليس جي قربانين سبب ڪراچي ۾ امن امان جي صورتحال بهتر آهي. هن چيو ته محرم الحرام ۾ خدشا هوندا آهن، سنڌ ۾ امن امان جي مسئلي بابت عالمن سان گڏجاڻي ڪئي آهي، اميد آهي ته ڏهين محرم تائين امان امان جي صورتحال بهتر رهندي. سنڌ جي گهرو وزير چيو ته صدر آصف علي زرداري امن امان بابت گڏجاڻي ڪئي هئي، صدر جو چوڻ هو ته ڏوهاري هٿيار ڦٽا ڪن ۽ پاڻ کي عدالت آڏو پيش ڪن. ضياءَ الحسن لنجار چيو ته ڪچي ۾ ڌاڙيلن کي ختم ڪيو پيو وڃي، ٽن هندو نوجوانن کي بازياب ڪرايو ويو آهي، نينگري پريا ڪماري بابت جلد سٺي خبر ملندي