ڪراچيءَ ۾ چيني شهرين تي فائرنگ جي واقعي ۾ ملوث جوابدارن کي عبرتناڪ سزا ڏني ويندي : شهباز شريف

وزيراعظم شهباز شريف چيو آهي ته ڪراچيءَ ۾ چيني شهرين تي فائرنگ جي واقعي ۾ ملوث جوابدارن کي عبرتناڪ سزا ڏني ويندي، چين ۽ پاڪستان جي پراڻي دوستي آهي، چيني شهرين تي حملو ٻنهي ملڪن جي لاڳاپن کي نقصان پهچائڻ جي ڪريل ڪوشش آهي، پاڪستان ۾ ڪم ڪندڙ چيني شهرين جي سڪيورٽي حڪومت جي ترجيح آهي. وزيراعظم شهباز شريف اسلام آباد ۾ چين جي سفارتخاني پهچي چيني سفير جيانگ زئيڊونگ سان ملاقات ڪري ڪراچي ۾ چيني شهرين تي فائرنگ واقعي جي مذمت ڪئي. وزيراعظم شهباز شريف چيني سفير سان ڳالهائيندي چيو ته چيني شهرين تي هن حملي جي مذمت ۽ زخمين جي عيادت لاءِ اوهان سان ملڻ آيا آهن، جوابدارن کي جلد گرفتار ڪري کين عبرتناڪ سزا ڏيارڻ کي يقيني بڻايو ويندو. سندس چوڻ هو ته هو واقعي ۾ ملوث ماڻهن کي گرفتار ڪرڻ ۽ کين عبرتناڪ سزا ڏيارڻ جي عمل جي هو پاڻ نگراني ڪري رهيو آهي، واقعي ۾ زخمي ٿيل چيني شهرين جي بهتر علاج لاءِ هدايت ڏئي چڪو آهي. وزيراعظم شهباز شريف چيو ته چين ۽ پاڪستان جي پراڻي دوستي آهي، چيني شهرين تي حملو ٻنهي ملڪن جي لاڳاپن کي نقصان پهچائڻ جي ڪريل ڪوشش آهي، پاڪستان ۾ ڪم ڪندڙ چيني شهرين جي سڪيورٽي حڪومت جي ترجيح آهي. چيني سفير، وزيراعظم شهباز شريف جي سفارتخاني آمد تي ٿورا مڃيا ۽ اميد جو اظهار ڪيو ته وزيراعظم واقعي جي ذميوارن کي جلد انجام تائين پهچائڻ ۾ ڪردار ادا ڪندو.