سپريم ڪورٽ  وڪيلن جي پيش نه ٿيڻ تي ملٽري ٽرائل ڪيس جي ٻڌڻي سڀاڻي تائين ملتوي ڪري ڇڏي

سپريم ڪورٽ  وڪيلن جي پيش نه ٿيڻ تي ملٽري ٽرائل ڪيس جي ٻڌڻي سڀاڻي تائين ملتوي ڪري ڇڏي آهي. جسٽس امين الدين خان جي سربراهي ۾ ست رڪني آئيني بينچ فوجي عدالتن ۾ عام ماڻهن جي ٽرائل خلاف انٽرا ڪورٽ اپيل جي ٻڌڻي ڪئي. ٻڌڻي شروع ٿي ته سلمان اڪرم راجا جي مددگار وڪيل رانا وقار عدالت کي ٻڌايو ته سلمان اڪرم راجا ٽريفڪ جي ڪري عدالت نه پهچي سگهيو ۽ سپريم ڪورٽ پهچڻ لاءِ صرف هڪ رستو، مارگلا روڊ کليل هو. ان تي جسٽس جمال مندوخيل ايڊووڪيٽ رانا وقار سان ڳالهائيندي چيو ته خواجه حارث پهچي ويو آهي، باقي ماڻهو به پهچي ويا آهن، توهان به پهچي ويا آهيو، جيڪڏهن سلمان اڪرم راجا اڌ ڪلاڪ اڳ اچي ها ته هن وقت هتي هجي ها، لڳي ٿو ته وڪيل چاهين ٿا ته ماڻهو جيل ۾ سڙندا رهن، ٺيڪ آهي، جيڪڏهن وڪيل اهو نٿا چاهين ته پوءِ ڇا ڪري سگهجي ٿو. جسٽس امين الدين خان پنهنجي ريمارڪس ۾ چيو ته جيڪڏهن ڪيس جي ڌر جي وڪيلن مان ڪو به دليل ڏيڻ چاهي ٿو ته هو ائين ڪري سگهي ٿو، جيڪڏهن وڊيو لنڪ تي ڪيس جي ڌر جو وڪيل آهي ته هو دليل ڏئي سگهي ٿو. جنهن تي عدالتي عملي ٻڌايو ته وڊيو لنڪ تي به ڪو وڪيل موجود ناهي، جنهن تي عدالت پنهنجي ريمارڪس ۾ چيو ته ڪيس جي ٻڌڻي سڀاڻي تائين ملتوي ڪري ڇڏينداسين. بعد ۾ عدالت مختصر حڪم جاري ڪيو جنهن ۾ چيو ويو ته ڪيس جي ٻڌڻي لاءِ سڏيو ويو، سلمان اڪرم راجا عدالت ۾ موجود نه هو، جنهن ڪري ڪيس جي ٻڌڻي سڀاڻي تائين ملتوي ڪئي وئي.