ميرپورخاص: ٽي ايم سي مير شير محمد جي  ھڪ ارب 35 ڪروڙن جي بجيٽ پيش، ھڪ لک 15 ھزار رپيا بچت ڏيکاري وئي ٽائون ميونسپل ڪارپوريشن مير شير محمد ٽالپر جي ھڪ ارب 35 ڪروڙ 96 لک 88 ھزار 828 رپين جي سال 24_2023ع جي لاءِ بجيٽ پيش ڪئي وئي، ٽي ايم سي جي بجيٽ اڪائونٽ آفيسر فرحان دايو پيش ڪئي.بجيٽ ۾ ٻڌايو ويو آھي ٽي ايم سي جي خرچن جو ڪاٿو ھڪ ارب 35 ڪروڙ، 95 لک 83 ھزار 828 آھي، اھڙيءَ ريت بجيٽ ۾ ھڪ لک 15 ھزار رپيا بچت ڏيکاري وئي آھي. بجيٽ ۾ ٻڌايو ويو تھ سنڌ حڪومت پاران ٽي ايم سي جي 11 يوسيز ۽ 44 وارڊن  ۾ ترقياتي ڪمن لاءِ 66 ڪروڙ رپيا ۽ ٽي ايم سي کي ملندڙ اسپيشل گرانٽ جي مد ۾ 15 ڪروڙ رپيا  ملڻ جي اميد آھي. اڪائونٽ آفيسر بجيٽ پيش ڪندي چيو تھ ٽائون ۾ 74 آفيسر مقرر ٿي وڃڻ جي اميد آھي، ان ڪري سندن پگھارن جي مد ۾ 6 ڪروڙ 22 لک رپيا رکيا آھن جڏھن تھ ڪائونسل ۾ اڳ ئي ڪم ڪندڙ ملازمن جي پگھارن جي مد ۾ 23 ڪروڙ 97 لک رپيا رکيا ويا آھن، اھڙيءَ ريت مجموعي طور پگھارن جي مد ۾ اٽڪل 30 ڪروڙ رپيا خرچ ٿي وڃن ٿا، جڏھن تھ ڪائونسل وٽ ھڪ ارب رپيا بچن ٿا، جيڪي ڪانٽيجنسي ۽ ترقياتي ڪمن جي مد ۾ خرچ ڪيا ويندا. بجيٽ بڪ ۾ چيئرمين آفيس جي خرچن لاءِ 73 لک 50 ھزار رپيا ۽ وائيس چيئرمين جي آفيس جي خرچن لاءِ 15 لک 45 ھزار رپيا رکيا ويا آھن، اھڙيءَ ريت جنرل ايڊمنسٽريشن برانچ جي خرچن لاءِ ھڪ ڪروڙ 57 لک 50 ھزار رپيا رکيا ويا آھن.