سنڌ جي وڏي وزير مراد علي شاهه چيو آهي ته ڊجيٽل لرننگ پروگرام لاءِ سنڌ ايجوڪيشن فائونڊيشن ۽ ٽيڪ دي ورلڊ فائونڊيشن وچ ۾ ڀائيواري هوندي، سنڌ ۾ سيف جي هڪ سئو ڊجيٽل اسڪولن کي مائيڪرو اسڪولز ۽ 25 ڊجيٽل ڪلاس رومز ٺاهيا ويندا، سنڌ سرڪار ڊجيٽل لرننگ اسڪولز لاءِ پروگرام تحت 710 ملين رپين جي سيڙپڪاري ڪري رهي آهي، ڊجيٽل پروگرام ذريعي پرائمري سطح تي گهٽ تعليم يافته 12 هزار 5 سئو کان وڌيڪ شاگردن کي تعليم جون اهم مهارتون سيکاريون وينديون. وڏو وزير مراد علي شاهه ملير جي علائقي رزاق آباد پهچي ويو. تعليم وارو صوبائي وزير سردار به وڏي وزير سان گڏ هو. وڏي وزير مراد علي شاهه سنڌ ايجوڪيشن فائونڊيشن جي پروگرام اڪسيليريڊيڊ ڊجيٽل لرننگ جي پروگرام جو افتتاح ڪري ڇڏيو. سنڌ ايجوڪيشن فائونڊيشن، ٽيچ دي ورلڊ سان گڏجي رزاق آباد ۾ ڊجيٽل مائڪرو اسڪول قائم ڪيو آهي جنهن جو وڏي وزير مراد علي شاهه افتتاح ڪيو. سيڪريٽري تعليم اڪبر لغاري، سيف جو ايم ڊي قاضي ڪبير، ٽيچ دي ورلڊ جي انتظاميا وڏي وزير جو آڌرڀاءُ ڪيو. وڏو وزير مراد علي شاهه ٻارن کي بليڪ بورڊ تي پڙهايو ۽ ٻارن سان رلي ملي ويو. وڏي وزير ٻارن جي والدين سان به ملاقات ڪئي. مائيڪرو اسڪول ڪانسيپٽ تحت اهي ٻارڙا ۽ ٻارڙيون داخل ڪيو ويون آهن جيڪي ڪڏهن اسڪول نه ويون. وڏي وزير مراد علي شاهه اسڪول ۾ سولر لڳائڻ جي هدايت ڪئي. وڏي وزير مراد علي شاهه تقريب کي خطاب ڪندي چيو ته ڊجيٽل لرننگ پروگرام لاءِ سنڌ ايجوڪيشن فائونڊيشن ۽ ٽيڪ دي ورلڊ فائونڊيشن وچ ۾ ڀائيواري هوندي، سنڌ ۾ سيف جي هڪ سئو ڊجيٽل اسڪولن کي مائيڪرو اسڪولز ۽ 25 ڊجيٽل ڪلاس رومز ٺاهيا ويندا. سندس چوڻ هو ته سنڌ سرڪار ڊجيٽل لرننگ اسڪولز لاءِ پروگرام تحت 710 ملين رپين جي سيڙپڪاري ڪري رهي آهي، ڊجيٽل پروگرام ذريعي پرائمري سطح تي گهٽ تعليم يافته 12 هزار 5 سئو کان وڌيڪ شاگردن کي تعليم جون اهم مهارتون سيکاريون وينديون. وڏي وزير مراد علي شاهه چيو ته تعليم جي بهتري لاءِ سنڌ حڪومت سيف تحت معياري منصوبا قائم ڪري رهي آهي، ڊجيٽل تعليم کي هٿي وٺرائڻ لاءِ هن منصوبي تحت تعليم جي واڌاري لاءِ ڪوشش ڪري رهيا آهن، سندس مقصد تعليم تائين پهچ ۽ تعليم جي معيار کي بهتر بڻائڻ آهي. هن چيو ته اڪسيليريڊيڊ ڊجيٽل لرننگ پروگرام جو هڪ شروعاتي مرحول اڄ ڪيو ڪيو پيو وڃي، ڊجيٽل لرننگ پروگرام کي ٽي ٽي ڊبليو ايف ذريعي لاڳو ڪيو ويندو، پراجيڪٽ 18 مهينن تائين هلندو ۽ ٻيهر ٻين سببن کي شامل ڪندي هن ۾ اضافو ڪيو ويندو، منصوبي جي شروعات ٻن مائيڪرو اسڪولز جي قيام سان ڪيو ويو آهي. وڏي وزير مراد علي شاهه چيو ته منصوبي جي شروعات ملير جي علائقي رزاق آباد کي ڪئي پئي وڃي، ايندڙ سال هڪ سئو مائيڪرو اسڪولز ۽ 25 ڊجيٽل ڪلاس رومز مڪمل ٿي ويندا، سيف کي جديد طريقي ذريعي صوبي ۾ معياري تعليم جي مدد لاءِ پابند ڪيو ويو آهي.

پ پ حڪومت ذوالفقار آباد ٺاهڻ ۾ ناڪامي کانپوءِ وري ٻيو نئون جديد شهر قائم ڪرڻ جو منصوبو رٿي ورتو. تجويز ڪيل نئون شهر ملير جي سامونڊي پٽي، گڏاپ، گهگهر کان موٽر وي، ڪاٺوڙ جا جبل ۽ ٺٽي جي ڌاٻيجي واري علائقي تي ٻڌل هوندو. نئون تجويز ڪيل شهر سيٽلائيٽ ٽائون نالي سان قائم ڪيو ويندو. مجوزہ نئين جديد شهر اڏڻ سان ڳوٺاڻي ضلعي ملير ۾ سوين ڳوٺن جو مستقبل به خطري ۾ پئجي ويندو. ڪراچي ۾ ڌارين آبادي جيان سيٽلائيٽ ٽائون قائم ٿيڻ سان ڌرتي ڌڻين لاءِ ٻيهر زمين تنگ ڪرڻ جا سانباها ڪيا ويا آهن. سياسي تڪرار کان بچڻ لاءِ سنڌ اسمبلي ۾ ملير ڊولپمينٽ اٿارٽي ترميمي بل جي نالي تي قانون سازي ڪئي ويندي. شروعاتي طور 17 ديھون ڪنٽرولڊ ايريا ۾ شامل ڪري سيٽلائيٽ ٽائون قائم ڪيو ويندو. تجويز ڪيل شهر ۾ ملير ضلعي جون الله ڦهائي، شاھه مريد، ماهيو، ناراٿر ۽ تَورِي ديھون شامل ڪيون وينديون. ديھه شاهي چب، لوهار ڪو لَنگ، مِٺا گهر، ٻولهاري ۽ لنگيجي به شامل ڪئي ويندي. ديھه ڪونڪار، کار کڙو، ڪاٺوڙ، اميلاڻو، ڌاٻيجي، گهگهر ۽ ڊانڊو به جديد شهر ۾ شامل ٿيندي.