ن ليگ اڳواڻ طلال چوڌري جي پنجن ورهين واري نااهليءَ جو مدو ختم ٿي ويو آهي. طلال چوڌري کي سپريم ڪورٽ 2 آگسٽ 2018ع تي توهين عدالت تي پنج سال نااهليءَ جي سزا ٻڌائي هئي. تڏهوڪي چيف جسٽس ثاقب نثار هڪ عوامي جلسي کي تقرير تي پاڻمرادو نوٽيس ورتو هو. طلال چوڌريءَ 2018ع ۾ فيصل آباد ۾ رٿيل جسلي ۾ آمريت کي قانوني سهارو فراهم ڪندڙ ججن تي تنقيد ڪئي هئي. سڌ سماءَ واري وفاقي مريم اورنگزيب ٽوئٽ ڪندي چيو ته طلال کي پنج سال نااهلي ختم ٿيڻ تي واڌايون، طلال چوڌريءَ نوازشريف ۽ پارٽيءَ سان نظرياتي وابستگي، وفا ۽ محبت تي پنج سال سزا ڀوڳي جيڪا اڄ ختم ٿي وئي. هن چيو ته طلال چوڌري پنجن ورهين کان پوءِ اهل ٿي ويو آهي، پر ناحق سزا ڏيندڙ عوام ۽ تاريخ جي نظر ۾ سڄي عمر لاءِ نااهل ٿي چڪا آهن

سپريم ڪورت فوجي عدالت ۾ عام شهرين جي ٽرائل خلاف درخواستن تي فل ڪورٽ جوڙڻ واري اپيل رد ڪري ڇڏي، چيف جسٽس رمارڪس ڏنا آهن ته فل ڪورٽ سيٽمبر ۾ دستياب ناهي، عدالتي موڪلون هلي رهيون آهن، سمورن ججن جون ذاتي مصروفيتون به آهن، جيڪي هن ڪيس سبب معطل آهن، ڪنهن کي وڻي يا نه هو پنهنجو ڪم ڪندا رهندا، سندن ڪم غلط آهي يا صحيح ان جو فيصلو وقت ۽ تاريخ ڪندي چيف جسٽس عمر عطابنديال جي سربراهيءَ ۾ 6 رڪني لارجر بئنچ عام شهرين جي ٽرائل خلاف درخواستن تي ٻڌڻي ڪئي ۽ محفوظ ٿيل فيصلو ٻڌايو. عدالت عام شهرين جي ٽرائل خلاف درخواستن تي فل ڪورٽ جوڙڻ واري درخواست رد ڪري ڇڏي. ٻڌڻي دوران چيف جسٽس، اٽارني جنرل منصور عثمان اعواڻ کان پڇاڻو ڪيو ته اوهان ڪجهه چوڻ چاهيو ٿا”؟ اٽارني جنرل چيو ته گذريل ڏينهن فيصل صديقي جي درخواست ٻڌي وئي، جيستائين ڪيس جو تعلق آهي ته سمورين ڌرين کي خاطري ڪرائي وئي آهي. هن چيو ته حراست ۾ ورتلن کي سندس گهرڀاتين سان ملڻ ۽ وڪيل ڪرڻ جي اجازت آهي، کين فيئر ٽرائل جو حق ڏنو پيو وڃي. اٽارني جنرل عدالت کي ٻڌايو ته 9 مئي واقعن ۾ ڪو به ڏوهه عمر قيد يا موت جي سزا واري نوعيت جو ناهي، ڪالهه لطيف کوسا چيو ته هڪ شخص کي جڊيشل مئجسٽريٽ آڏو پيش ٿيڻ کان روڪيو ويو. منصور عثمان اعواڻ چيوته گرفتار 102 ڄڻن مان ڪنهن کي به روڪڻ جو واقعو پيش ناهي آيو، هر شخص جي عزت جو خيال رکيو پيو وڃي،هو خاطري ڪرائي ٿو ته گرفتار 102 ڄڻن مان ڪنهن سان به خراب ورتاءُ نه ڪيو ويو، ائين ٿيو ته ترت ايڪشن ورتو ويندو. چيف جسٽس عمر عطابنديال فل ڪورٽ واري درخواست رد ڪندي چيو ته فل ڪورٽ سيٽمبر ۾ دستياب ناهي، عدالتي موڪلون هلي رهيون آهن، سمورن ججن جون ذاتي مصروفيتون به آهن، جيڪي هن ڪيس سبب معطل آهن. هن چيو ته هو الله آڏو جوابده آهن، ان ڪري پنهنجو ڪم جاري رکيو، ڪنهن کي وڻي يا نه هو پنهنجو ڪم ڪندا رهندا، سندن ڪم غلط آهي يا صحيح ان جو فيصلو وقت ۽ تاريخ ڪندي. چيف جسٽس چيو ته سپريم ڪورٽ جو فيصلو آهي ته قانون کان هٽي قائم ڪيل ڪورٽ کي عدالت تصور نه ڪيو ويندو، محرم علي ڪيس ۾ چيو ته سپريم ڪورٽ يا هائيڪورٽ جي سپروائزري کانسواءِ عدالت قائم نٿي ٿي سگهي. جسٽس عائشه ملڪ چيو ته آئين تحت بنيادي انساني حقن جي سهولت شهرين کي حاصل آهي، هر شهريءَ وت ڪنهن به عدالت ۾ وڃڻ وقت آزادي جو حق هوندو آهي. هن چيو ته اهڙي عدالت جيڪا آرٽيڪل 175ايَ تحت ناهي پر عدالت آهي، ان ۾ سويلينز کي آزادي ڪيئن هوندي؟ اٽارني جنرل چيو ته آرمي ايڪٽ جون اڪثرن شقون ورديءَ وارن تي لاڳو ٿينديون آهن. چيف جسٽس چيو ته ڪيس جي ٻڌڻي جاري رهندي. اٽارني جنرل چيو ته کيس به ان بابت هدايتون وٺڻيون آهن، ايڊجوٽنٽ جنرل سان ڳالهه ٻولهه ٿي آهي، اهو فوج جي سربراهه سان ڳالهائيندو. هن چيو ته آرمي ايڪٽ ۾ هڪ ته پرڏيهي آهن جيڪي جاسوسي سميت ٻين ڏوهن ۾ ملوث آهن،  ٻيو اهو ته آرمي ايڪٽ هيٺ ڪورٽ مارشل وارو معاملو آهي، ٽيون اهڙا ماڻهو جيڪي فوج خلاف دهشتگرد ڪاررواين ۾ ملوث سمورن معاملن کي نظر ۾ رکندي غور ڪيو وڃي. جسٽس منيب اختر چيو ته عام شهرين لاءِ ملٽري ڪورٽن ۾ متوازن عدالتي نظام نه هوندو، جنهن تي اٽارني جنرل چيو ته هدايتون وٺي هو سمورو روڊ ميپ عدالت آڏو پيش ڪندو. چيف جسٽس چيو ته ممڪن آهي ته ڪو هاڪاري جواب ملي، جنهن سان درخواست ڏيندڙن جا خدشا ختم ٿي وڃن. عدالت ڪيس جي ٻڌڻي سڀاڻي تائين ملتوي ڪري ڇڏي

ترڪيه جي نائب صدر جودت يلماز چيو آهي ته هر قسم جي دهشتگردي جي مذمت ڪن ٿا، اها عالمي امن لاءِ خطرو آهي، ترڪيه ۽ پاڪستان سرحد پار دهشتگردي کي منهن ڏئي رهيا آهن،  ترڪيه دهشتگردي خلاف 40 ورهين کان وڙهي رهيو آهي، دهشتگردي خلاف پاڪستان جي قدمن جي حمايت ڪريون ٿا، ٻوڏ ۾ جتي ترڪيه پاڪستان جي مدد ڪئي، اتي زلزلي ۾ پاڪستان جو سهڪار مثالي هو، ٻنهي ملڪن جا لاڳاپا مضبوط کان مضبوط ٿي رهيا آهن. سامونڊي فوج جي جنگي جهاز پي اين ايس طارق جي افتتاحي تقريب کي خطاب ڪندي ترڪيه جي نائب صدر چيو ته پاڪستان سان هي آخري دفاعي منصوبو ناهي، هو دهشتگردي خلاف دهشتگردي خلاف پاڪستان جي قدمن جي حمايت ڪن ٿا. سندس چوڻ هو ته هو هر قسم جي دهشتگردي جي مذمت ڪن ٿا، اها عالمي امن لاءِ خطرو آهي. ترڪيه جي نائب صدر جودت يلماز چيو ته ترڪيه ۽ پاڪستان سرحد پار دهشتگردي کي منهن ڏئي رهيا آهن،  ترڪيه دهشتگردي خلاف 40 ورهين کان وڙهي رهيو آهي. هن چيو ته  ٻوڏ ۾ جتي ترڪيه پاڪستان جي مدد ڪئي، اتي زلزلي ۾ پاڪستان جو سهڪار مثالي هو، ٻنهي ملڪن جا لاڳاپا مضبوط کان مضبوط ٿي رهيا آهن. ترڪيه جي نائب صدر جودت يلماز چيو ته موجوده عالمي حالتن ۾ پاڪستان ۽ ترڪيه جا لاڳاپا وڌيڪ اهميت حاصل ڪري ويا آهن، ترڪيه دفاي شعبي ۾ وڏيون ڪاميابيون حاصل ڪيون آهن.

وزيراعظم شهباز شريف چيو آهي ته پاڪستان ۽ ترڪيه تاريخي ۽ مذهبي رشتي ۾ ڳنڍيل آهن، زلزلي ۽ ٻوڏ جهڙي قدرتي آفتن ۾ ترڪيه ڀرپور مدد ڪئي، وقت جي گهرج آهي ته ٻئي ملڪ اسٽريٽجڪ سهڪار کي هٿي وٺرائن، گوادر کي به هڪ اهم واپاري مرڪز بڻايو آهي، سي پيڪ هڪ گيم چينجر منصوبو آهي جنهن تي تيزي سان ڪم جاري آهي، سي پيڪ ترقي جو رستو آهي، اميد آهي ته ترڪيه به فائدو وٺي سگهي ٿو. سامونڊي فوج جي جنگي جهاز پي اين ايس طارق جي افتتاحي تقريب ڪراچي شپ يارڊ ۾ ٿي. تقريب ۾ وزيراعظم شهباز شريف، ترڪيه جي نائب صدر جودت يلماز، پرڏيهي وزير بلاول ڀٽو زرداري، وفاقي وزير احسن اقبال، سنڌ جي گورنر ڪامران ٽسوري، وڏي وزير مراد علي شاهه، نيول چيف ۽ ٻين شرڪت ڪئي. وزيراعظم شهباز شريف ترڪيه جي سهڪار سان تيار ڪيل جنگي جهاز پي اين ايس طارق جو افتتاح ڪيو. افتتاحي تقريب کي خطاب ڪندي وزيراعظم شهباز شريف چيو ته ترڪيه جي نائب صدر جي ڪراچي آمد تي سندس ٿورائتا آهن، هو ڪراچي شپ يارڊ جي آفيسرن، انجنيئرن، ورڪرن ۽ ٻين لاڳاپيل ماڻهن کي مبارڪ ڏئي ٿو. سندس چوڻ هو ته ملجم ڪلاس ڪورويٽ چوٿون سامونڊي جهاز آهي جيڪو پاڪستان ۽ ترڪيه گڏجي تيار ڪيو آهي، پاڪستان ۽ ترڪيه تاريخي ۽ مذهبي رشتي ۾ ڳنڍيل آهن. وزيراعظم شهباز شريف چيو ته زلزلي ۽ ٻوڏ جهڙي قدرتي آفتن ۾ ترڪيه ڀرپور مدد ڪئي، وقت جي گهرج آهي ته ٻئي ملڪ اسٽريٽجڪ سهڪار کي هٿي وٺرائن. هن چيو ته گوادر کي به هڪ اهم واپاري مرڪز بڻايو آهي، سي پيڪ هڪ گيم چينجر منصوبو آهي جنهن تي تيزي سان ڪم جاري آهي. وزيراعظم شهباز شريف چيو ته سي پيڪ ترقي جو رستو آهي، اميد آهي ته ترڪيه به فائدو وٺي سگهي ٿو.