وزيراعظم شهبازشريف چيو آهي ته افغانستان پنهنجي ڌرتي پاڙيسري ملڪن ۾ دهشتگردي لاءِ استعمال ٿيڻ کان روڪي، دهشتگردن جا بزدلاڻا حملا دهشتگردي جي خاتمي واري عزم کي ڪمزور نه ٿا ڪري سگهن. وزيراعظم شهبازشريف ۽ آرمي چيف جنرل عاصم منير پشاور پهچي سي ايم ايڇ اسپتال جو دورو ڪيو ۽ باجوڙ ڌماڪي جي  زخمين جي عيادت ڪئي. شهبازشريف عملدارن کي زخمين جي مڪمل صحتيابي تائين علاج جون بهترين سهولتون فراهم ڪرڻ جي هدايت ڪئي. وزيراعظم متاثرن کي خاطري ڪرائي ته قوم ڏک جي گهڙيءَ ۾ ساڻن گڏ بيٺل آهي، دهشتگردن جا بزدلاڻا حملا دهشتگردي جي خاتمي واري عزم کي ڪمزور نه ٿا ڪري سگهن. هن چيو ته افغان عبوري حڪومت کي پنهنجي ڌرتي ٻئي ملڪ ۾ دهشتگرديءَ لاءِ استعمال ٿيڻ کان روڪڻ لاءِ قدم کڻڻ گهرجن. دوري دوران وزيراعظم  ۽ آرمي چيف  کي مجموعي سڪيورٽي صورتحال تي بريفنگ ڏني وئي. برينفگ ۾ ٻڌايو ويو ته آپگهاتي حملن ۾ افغان شهري ملوث آهن. وزيراعظم، زخمين کي پشاور منتقل ڪرڻ لاءِ پاڪ فوج جي هنگامي ڪوششن جي واکاڻ پڻ ڪئي.

پرڏيهي وزير بلاول ڀٽو زرداري چيو آهي ته پاڪستان مدد لاءِ تيار آهي، افغانستان دهشتگردي روڪي، افغان اختياريون ڪارروايون نه ٿيون ڪن ته سندن ايڪشن ٿي سگهي ٿو، پر اهو سندن پهريون آپشن نه هوندو. پرڏيهي آفيس ۾ تقريب کي خطاب ڪندي بلاول ڀٽو زرداري چيو ته هو سمجهن ٿا ته افغان انتظاميا پاڪستان تي حملو ڪندڙن خلاف ڪارروائي ڪندي. هن چيو ته وسيلن جي کوٽ آهي ته پاڪستان افغانستان جي مدد لاءِ تيار آهي، پر جيڪڏهن ڪارروائي ۾ نيت جو مسئلو آهي ته اها ڌار ڳالهه آهي. پرڏيهي وزير چيو ته افغانستان کان دهشتگردي تي هو پنهنجي دفاع لاءِ عالمي قانون  تي عمل ڪندا، افغان اختياريون ڪارروايون نه ٿيون ڪن ته سندن ايڪشن ٿي سگهي ٿو، پر اهو سندن پهريون آپشن نه هوندو. بلاول ڀٽو زرداري چيو ته نيٽو جيڪي هٿيار ۽ سامان ڇڏيو آهي، اهو ڪجهه هنڌن تي دهشتگردن وٽ آهي، دهشتگردي بابت سندن پاليسي واضح آهي، هو بلاڪن جي سياست ۾ ناهن. پرڏيهي وزير چيو ته پرڏيهي وزير طور سندس منشور هو ته وزارت کي بهتر بڻايو وڃي.

قومي اسيمبليءَ سيڪريٽ ايڪٽ ۾ ترميمون منظور ڪري ورتيون، جنهن تحت جنگ  سان گڏوگڏ امن واري زماني کي به شامل ڪري سگهبو، حڪومت کي امن واري حالت ۾ ڪنهن به هنڌ، علائقي، زميني يا سامونڊي رستي کي پابندي مڙهيل قرار ڏيڻ جو اختيار حاصل هوندو. قومي اسيمبلي جو اجلاس ڊپٽي اسپيڪر زاهد اڪرم دراني جي صدارت هيٺ ٿيو، جنهن ۾ وفاقي وزير مرتضيٰ جاويد عباسيءَ آفيشل سيڪريٽ ايڪٽ 1923ع ۾ ترميم جو بل پيش ڪيو، جنهن کي ايوان منظور ڪري ورتو. وفاقي وزير بل کي ضمني ايجنڊا طور پيش ڪيو. بل موجب لکت يا نه لکيل، ورچوئل، اليڪٽرانڪ يا ڊجيٽل مسودي کي به دستاويز ۾ شامل ڪرڻ جي تجويز ڏني وئي. بل موجب ملٽري صلاحيت، يا هٿيار، بارود جي خريد ۽ وڪري بابت معاملن کي ايڪٽ ۾ شامل ڪرڻ، انٽيليجنس جي تعريف ۾ آءِ بي سان گڏوگڏ آءِ ايس آءِ کي به شامل ڪرڻ، پابندي مڙهيل هنڌن جي تعريف ۾ دفاع پاڪستان بابت آفيسون، ڪيمپ آفيسون ۽ عمارت جي ڪنهن به حصي کي شامل ڪرڻ جي تجويز ڏني وئي آهي. ايڪٽ تحت جنگ  سان گڏوگڏ امن واري زماني کي به شامل ڪري سگهبو، حڪومت کي امن واري حالت ۾ ڪنهن به هنڌ، علائقي، زميني يا سامونڊي رستي کي پابندي مڙهيل قرار ڏيڻ جو اختيار حاصل هوندو. بل موجب هٿياربند فوج طرفان وار گيمز، مشقن، تربيت، تحقيق يا ترقي، فوج جي چرپر، ان ڪيمرا بريفنگ لاءِ عارضي طور تي استعمال ٿيندڙ ڪيسن کي به منع ڪيل قرار ڏيڻ جي تجويز آهي. پاس ڪيل بل موجب ملڪ اندر يا ٻاهر پرڏيهي ايجنٽ سان رابطو ملڪ دشمني هوندو، ڳجهن اهلڪارن، خبري يا ذريعن جي سڃاڻپ ٻڌائڻ ڏوهه هوندو، شڪ جي بنياد تي ڳجها ادارا ڪنهن به هنڌ يا شخص جي بنا وارنٽ جهڙتي وٺي سگهندا، ڳجهي اداري جا آفيسر گرفتار شخص يا ضبط ٿيل سامان کي جاچ آفيسر يا جي آءِ ٽي کي ڏيڻ جو پابند هوندو، جي آءِ ٽي تيرهن ڏينهن ۾ جاچ مڪمل ڪرڻ جي پابند هوندي.