وزيراعظم شهباز شريف ۽ پرڏيهي وزير بلاول ڀٽو زرداري مولانا فضل الرحمان جي گهر پهچي باجوڙ ۾ جي يو آءِ جي ورڪرز ڪنوينشن ۾ ٿيل آپگهاتي ڌماڪي تي ڏک جو اظهار ڪيو. وزيراعظم شهبازشريف جي يو آءِ سربراهه مولانا فضل الرحمان جي گهر پهچي باجوڙ سانحي تي ڏک جو اظهار ڪيو. ان موقعي تي وزيراعظم شهبازشريف چيو ته باجوڙ ۾ جي يو آءِ جي ورڪرز ڪنوينشن تي حملو پاڪستان جي جمهوريت تي حملو آهي، واقعي تي سڄي ملڪ ۾ ڏک ۽ ڪاوڙ واري لهر ڇانيل آهي. وزيراعظم شهباشريف آپگهاتي حملي ۾  شهيد ٿي ويل جي يو آءِ جي اڳواڻن ۽ ڪارڪنن جي وارثن سان به ڏک جو اظهار ڪندي چيو ته زخمين کي بهتر طبي سهولتون فراهم ڪرڻ جي هدايت ڪئي آهي، واقعي جي ذميوارن جي جلد نشاندهي ڪري کين آخري انجام تي پهچايو ويندو. ٻئي پاسي پرڏيهي وزير بلاول ڀٽو زرداري مولانا فضل الرحمان جي گهر پهچي باجوڙ ۾ جي يو آءِ جي ورڪرز ڪنوينشن ۾ ٿيل آپگهاتي ڌماڪي تي ڏک جو اظهار ڪيو. پرڏيهي وزير بلاول ڀٽو زرداري مولانا عبدالغفور حيدري، مولانا عطاءَ الرحمان، مولانا اسد محمود ۽ زاهد اڪرام دراني سان به جي ويو آءِ اڳواڻن ۽ ڪارڪنن جي شهادت تي افسوس جو اظهار ڪيو. پ پ چيئرمين بلاول ڀٽو زرداري سان گڏ سنڌ جي وڏو وزير مراد علي شاهه به واقعي تي افسوس جو اظهار ڪيو. پ پ چيئرمين ۽ پرڏيهي وزير بلاول ڀٽو زرداري چيو ته پاڪستان پيپلزپارٽي جي يو آءِ جي ڪارڪنن ۽ همدردن سان ڏک ۾ برابر جي شريڪ آهي، سانحو ملڪ ۾ امن جي صورتحال خراب ڪرڻ جي هڪ ٻي ڪوشش آهي.

اسلام آباد جي عدالت طرفان تحريڪ انصاف چيئرمين کي توشا خانا ڪيس ۾ بيان قلمبند ڪرائڻ لاءِ اڄ ذاتي حيثيت ۾  پيش ٿيڻ جي هدايت ڪئي وئي جڏهن ته  عدالت  بيان قلمبند ڪرڻ جي تاريخ وڌائڻ جي درخواست رد ڪري ڇڏي، عدالت رمارڪس ڏيندي چيو آهي ته تحريڪ انصاف چيئرمين ۽ وڪيل ڪيس کي اينگهائڻ جي ڪوشش ڪري رهيا آهن. اسلام آباد جي عدالت ۾ ڪيس جي ٻڌڻي دوران  پي ٽي آءِ چيئرمين جي وڪيل خواجه حارث چيو ته افسوس جي ڳالهه آهي ته هائيڪورٽ ۾ معاملو ٻڌڻي هيٺ هو ۽ هتي ڪارروائي ٿيندي رهي. هن چيو ته پي ٽي آءِ چيئرمين کي هائيڪورٽ جي ڊائري برانچ کان نيب گرفتار ڪيو، ٻئي ڏينهن پوليس لائن عدالت ۾ پيش ڪيو ويو. سندس چوڻ هو ته فرد جرم جي ڪارروائي تي سندن ٽي اعتراض آهن. عدالت رمارڪس ڏيندي چيو ته اهو فرد جرم لاڳو ٿيڻ واري ڏينهن جو واقعو آهي. خواجه حارث چيو ته اليڪشن ڪميشن شاهدن کان بيان جو رڪارڊ طلب ڪيو، سيشن عدالت جي فيصلن بابت مختلف عدالتن ۾ ڀڄي رهيا آهن. اليڪشن ڪميشن جي وڪيل امجد پرويز چيو ته موجوده صورتحال موجب سيشن ڪورٽ ٽرائل جاري رکي سگهي ٿي، اڃا ٽرائل جاري آهي، فيصلو جاري نه ڪيو ويو آهي، ٽرائل جاري رکڻ کان روڪي نه ٿو سگهجي. جج رمارڪس ڏيندي چيو ته  پي ٽي آءِ چيئرمين جي درخواستن جو مقصد ٽرائل ۾ دير ڪرائڻ آهي. هن چيو ته پي ٽي آءِ چيئرمين ۽ سندس سينئر وڪيل خواجه حارث جو رويو سڀني سامهون آهي.

حڪومت پيٽروليم شئين جي اگهن ۾ هڪ ڀير ٻيهر واڌ جو اعلان ڪري ڇڏي. پيٽرول جي قيمت ۾ 19 رپيا 95 پئسا ۽ ڊيزل جي قيمت ۾ 19 رپيا 90 پئسا واڌ ڪئي وئي آهي.