وفاقي گهرو وزير محسن نقوي چيو آهي ته هو محرم الحرام دوران امن امان برقرار رکڻ لاءِ سمورن صوبن جي ضرورتن کي پورو ڪري رهيا آهن. ڪراچي ۾ وفاقي گهرو وزير محسن نقوي برهاني محل ۽ شاهه شهيدن امام بارگاهه جو دورو ڪيو ۽ برهاني محل ۾ دائودي بوهرا برادري جي سربراهه سيدنا مفضل سيف الدين سان ملاقات ڪئي. سيدنا مفضل سيف الدين جو پٽ شهزاده حسين برهان الدين به موجود هو. وفاقي گهرو وزير محسن نقوي، سيدنا مفضل سيف الدين لاءِ نيڪ خواهشن جو اظهار ڪندي چيو ته پاڪستان آمد تي اوهان کي دل جي گهراين سان ڀليڪار ڪن ٿا. محسن نقوي چيو ته اوهان جي آمد سندن لاءِ فخر جو باعث آهي، اوهان سان عقيدت ۽ احترام جو رشتو هميشه قائم رهندو، دائودي بوهري برادري امن پسند ۽ پيار ڪندڙ برادري آهي. سيدنا مفضل سيف الدين دائودي بوهري برادري جا مسئلا فوري طور حل ڪرڻ تي گهرو وزير محسن نقوي جا ٿورا مڃيا ۽ چادر ۽ تبرڪات جا تحفا  ڏنا. وفاقي گهرو وزير محسن نقوي سولجر بازار ۾ شاهه شهيدان امام بارگاهه ۾ انتظامن جو جائزو ورتو ۽ سيڪيورٽي انتظامن جو معائنو ڪيو. شاهه شهيدان امام بارگاهه جي دوري جي موقعي تي وفاقي گهرو وزير محسن نقوي جي مولانا آيت الله عقيل الغربي ۽ سنڌ جي اڳوڻي نگران وڏي وزير جسٽس رٽائرڊ مقبول باقر سان ملاقات ٿي. ملاقات دوران مولانا آيت الله عقيل الغربي ۽ مقبول باقر امن امان جي بهترين انتظامن تي وفاقي گهرو وزير محسن نقوي جا ٿورا مڃيا. ان موقعي تي ڳالهائيندي وفاقي گهرو وزير چيو ته شاهه شهيدان امام بارگاهه تي سڪيورٽي ۽ ٻيا انتظام بهتر آهن، وفاق محرم الحرام دوران امن امان کي برقرار رکڻ لاءِ سمورن صوبن سان رابطي ۾ آهي. محسن نقوي چيو ته هو محرم الحرام دوران امن امان برقرار رکڻ لاءِ سمورن صوبن جي ضرورتن کي پورو ڪري رهيا آهن.

جسٽس عاليه نيلم چيف جسٽس لاهور هائيڪورٽ جي عهدي جو قسم کڻي ورتو آهي. لاهور هائيڪورٽ جي پهرين عورت چيف جسٽس جي قسم کڻڻ واري تقريب گورنر هائوس لاهور ۾ ٿي. تقريب ۾ پنجاب جي گورنر سردار سليم حيدر، جسٽس عاليه نيلم کي چيف جسٽس لاهور هائيڪورٽ جي عهدي جو قسم کڻايو. قسم کڻڻ واري تقريب ۾ پنجاب جي وزيراعليٰ مريم نواز، وفاقي وزير اعظم نذير تارڙ، آءِ جي پنجاب، لاهور هائيڪورٽ جي جسٽس علي باقر نجفي، جسٽس عابد عزيز شيخ ۽ ٻين شرڪت ڪئي. تقريب بعد چيف جسٽس عاليه نيلم سان پنجاب جي وزيراعليٰ مريم نواز ملاقات ڪئي، جنهن دوران مريم نواز، عهدو سنڀالڻ تي عاليه نيلم کي مبارڪ ڏني. صدر آصف علي زرداري طرفان منظوري ڏيڻ بعد قانون واري وزارت، جسٽس عاليه نيلم جي چيف جسٽس لاهور هائيڪورٽ جي مقرري جو نوٽيفڪيشن جاري ڪيو هو.

سڪيورٽي فورسز  پشاور جي  علائقي حسن خيل ۾ سڪيورٽي فورسز جي آپريشن دوران  هاءِ پروفائل دهشتگرد ڪمانڊر سميت 3 دهشتگرد مارجي ويا، چار جوان شهيد ٿي ويا. آءِ ايس پي آر طرفان طرفان جاري ڪيل بيان ۾ چيو ويو ته سڪيورٽي فورسز پوليس سان گڏجي ڳجهي ڄاڻ جي بنياد تي  پشاور جي علائقي حسن خيل ۾ آپريشن ڪيو. پاڪ فوج جي ترجمان موجب آپريشن دوران فائرنگ جي ڏي وٺ ۾ هاءِ پروفائل دهشتگرد ڪمانڊر عبدالرحيم سميت 3 دهشتگرد مارجي ويا. آءِ ايس پي آر موجب مارجي ويل دهشتگردن وٽان هٿيار ۽ بارودي مواد هٿ ڪيو ويو آهي. پاڪ فوج جي ترجمان چيو ته مارجي ويل دهشتگردن وٽان هٿيار ۽ بارودي مواد هٿ ڪيو ويو آهي. آءِ ايس پي آر موجب فائرنگ کي سخت ڏي وٺ ۾ پاڪ فوج جا چار جوان به شهيد ٿي ويا. شهادت ماڻيندڙن ۾ صوابي سان تعلق رکندڙ 34 ورهين جو سپاهي محمد ادريس، 34 ورهين جو ڪوٽاٽ واسي سپاهي بدام گل، 38 ورهين جو سب انسپيڪٽر تاج مير شاهه ۽ سي ٽي ڊي ڪي پي جو اسٽنٽ سب انسپيڪٽر محمد اڪرم شامل آهن. آءِ ايس پي آر موجب سڪيورٽي فورسز ملڪ ۾امن ۽ استحڪام يقيني بڻائڻ لاءِ قانون لاڳو ڪندڙ ادارن سان ڪلهو ڪلهي ۾ ملائي بيٺل آهي، بهادر جوانن جون قربانيون سندن عزم کي وڌيڪ مضبوط ڪن ٿيون.

قومي اسيمبليءَ جي اجلاس دوران وزيراعظم شهبازشريف ۽ پي ٽي آءِ اڳواڻ اسد قيصر وچ ۾ سخت جملن جي ڏي وٺ ٿي. اسيمبلي جي اجلاس کي خطاب ڪندي وزيراعظم شهبازشريف چيو ته هنن ڪڻڪ ايڪسپورٽ ڪرڻ جي اجازت نه ٿي، ان بابت ڪو فيصلو ناهي ٿيو. هن چيو ته پي ٽي  آءِ دور ۾ ڪڻڪ امپورٽ ۽ پوءِ ايڪسپورٽ ٿي، اربين رپيا کاڌا ويا ڪنهن کي خبر ناهي؟ شهبازشريف چيو ته اسد قيصر احترام جوڳو آهي، پر جڏهن هو اسپيڪر هو  ته مخالف ڌر جي اڳواڻ کي ڳالهائڻ جي اجازت نه هوندي هئي، اهو رڪارڊ تي موجود آهي. وزيراعظم جي اسد قيصر بابت رمارڪس تي مخالف ڌر احتجاج ڪندي نعري بازي ڪئي وئي. اسد قيصر خطاب ڪندي چيو ته وزيراعظم سندس بابت ڳالهايو، درخواست آهي ته پراڻو رڪارڊ ڪڍرايو، ميان صاحب مخالف ڌر جي اڳواڻ طور ڪيترائي ڪلاڪ تقرير ڪندو هو. هن چيو ته تاريخ ۾ ڪڏهن به ائين ناهي ٿيو ته اجلاس ۾ ناڻي واري وزير جي تقرير کان اڳ مخالف ڌر ڳالهايو هجي، شهبازشريف مخالف ڌر جي اڳواڻ طور 84 ڪلاڪ تقرير ڪئي. اسد قيصر چيو ته سندن دور ۾ تقريرون لائيو هلنديون هيون، هاڻي سينسرشپ آهي، هاڻي مخالف ڌر جي اڳواڻ جي گهر تي ڇاپا هنيا ويندا آهن.