پ پ چيئرمين بلاول ڀٽو زرداري چيو آهي ته دهشتگردن جا ارادا ناڪام بڻائڻ لاءِ  دهشتگردي جي موقف کي شڪست ڏيڻي پوندي، صوبي ۾ امن قائم ڪرڻ لاءِ هيٺين سطح تائين  سياسي عمل ضروري آهي. پ پ چيئرمين بلاول ڀٽو زرداري بلوچستان جي ٻن ڏينهن جي ڪوئيٽا پهتو، جتي وڏي وزير  سرفراز بگٽي، صوبائي وزيرن ۽ پ پ عهديدارن  سندس آجيان ڪئي. بلاول ڀٽو زرداريءَ جي صدارت هيٺ وزيراعليٰ هائوس ڪوئيٽا ۾ اجلاس ٿيو، جنهن ۾  وڏي وزير کيس بريفنگ ڏني. پ پ چيئرمين کي ٻڌايو ويو ته بلوچستان جي تعليم لاءِ 300 سيڪڙو اضافو ڪيو ويو آهي، جڏهن ته صحت جي بجيٽ 129 سيڪڙو وڌائي وئي آهي، صوبي ۾ 30 هزار  کان وڌيڪ زرعي ٽيوب ويل سولر تي منتقل ڪرڻ لاءِ  ڪم شروع ڪيو ويو آهي. بريفنگ ۾ ٻڌايو ويو ته يوٿ اسڪلز ڊولپمينٽ پروگرام تحت ٻن ورهين ۾ 30 هزار نوجوانن تربيت فراهم ڪئي ويندي، جڏهن ته پي ايڇ ڊي ڪندڙ نوجوانن کي  صوبائي حڪومت اسڪالرشپ ڏيندي. ان موقعي تي ڳالهائيندي بلاول ڀٽو زرداري چيو ته دهشتگردن جا ارادا ناڪام بڻائڻ لاءِ  دهشتگردي جي موقف کي شڪست ڏيڻي پوندي، صوبي ۾ امن قائم ڪرڻ لاءِ هيٺين سطح تائين  سياسي عمل ضروري آهي. هن چيو ته بلوچستان ۾ پهرين يوٿ پاليسي سٺو سنوڻ آهي، پر ان تي عمل ضروري آهي ته جيئن نوجوانن کي وڌ کان وڌ موقعا ملي سگهن. بلاول ڀٽو زرداري چيو ته بلوچستان ۾ سنڌ جيان صحت جي منصوبن کي فوري طور مڪمل ڪيو وڃي ۽ گهرن جي اڏاوت وارو ڪم به تيز ڪيو وڃي. پ پ چيئرمين هدايت ڪئي ته گوادر کان سبي ۽ جعفرآباد تائين سموري بلوچستان جي انفرااسٽرڪچر جي بهتري لاءِ هنگامي بنيادن تي قدم کنيا وڃن. ان کان اڳ بلاول ڀٽو زرداري ۽ سرفراز بگٽيءَ وچ ۾ ملاقات وزيراعليٰ هائوس ۾ ٿي، جنهن دوران پ پ چيئرمين وڏي وزير کان بلوچستان جي عوام جي ڀلائي ۽ ترقي جي منصوبن بابت بريفنگ ڏني…..

توانائي واري وفاقي وزير اويس لغاري چيو آهي ته پهرين جولاءِ کان بجلي جي قميت ۾ 9 سيڪڙو اضافو ٿيندو، ڪنزيومرز ايوريج 35 رپيا في يونٽ ڏني پئي وڃي. سينيٽ اجلاس دوران ڳالهائيندي اويس لغاري چيو ته ڪجهه اهڙا پلانٽ آهن، جيڪي ڪي اليڪٽرڪ جي ملڪيت آهن، لائن لاسز وارن علائقن ۾ لوڊشيڊنگ ٿي رهي آهي، آئيسڪو ريجن ۾ وڌيڪ مسئلا ناهن، اميد ته آهستي آهستي مسئلن تي ضابطو آندو ويندو. هن چيو ته نيشنل گرڊ جو ڪنهن به صوبي سان ڪو تعلق ناهي، نقصانن جي حد رکڻ لاءِ لوڊشيڊنگ ڪئي پئي وڃي، بلوچستان جي ڪجهه علائقن ۾ رڪوري تمام سٺي آهي. اويس لغاريءَ چيو ته بلوچستان کي 10 هزار ميگا واٽ جي سپلاءِ ڏيڻ لاءِ هو تيار آهن، بل جون نه پر جولاءِ کان وڌندا، بلوچستان ۾ بجلي جا 600 ارب رپيا ساليانا نقصان آهن. توانائيءَ واري وفاقي وزير چيو ته حڪومت 450 ارب رپين جو نقصان برداشت ڪيو، هڪ ڪروڙ 68  واهپيدارن جو خيال ڪيو پيو وڃي.. هن چيو ته ميڊيا تي خبرون هلي رهيون آهن ته ڪابينا بجلي جي اگهن ۾ اضافو ڪري ڇڏيو، بجلي اگهن بابت وزيراعظم 150 ارب رپين جو بار عوام تان گهٽايو آهي. توانائي واري وفاقي وزير چيو ته گهريلو واهيپدارن کي هر ممڪن رليف فراهم ڪيو پيو وڃي، زرعي سولرائيزيشن  ڪئي پئي وڃي.

وزيراعظم شهبازشريف گڏيل قومن جي سيڪريٽري جنرل سميت عالمي اڳواڻن سان ملاقاتون ڪيون. شنگهائي سهڪار تنظيم جي سربراهي اجلاس جي موقعي تي وزيراعظم شهبازشريف جي عالمي اڳواڻن سان ملاقاتون ڪيون. شهبازشريف جي گڏيل قومن جي سيڪريٽري جنرل انتونيو گوتريس سان ملاقات ٿي، جنهن ۾ گڏيل دلچسپي وارن معاملن تي ڳالهيون ڪيون ويون. وزيراعظم جي ترڪ صدر رجب طيب اردگان، آذر بائيجان جي صدر الهام علي يوف، تاجڪ صدر امام علي رحمان ۽ ڪرغستان جي صدر سدير جاپروف سان به ملاقات ٿي. ملاقات دوران گڏيل دلچسپي وارن معاملن تي ڳالهيون ڪيون ويون…..

سپريم ڪوٽ اليڪشن ٽربيونلز جي جوڙجڪ بابت لاهور هائيڪورٽ ۽ اليڪشن ڪميشن جو فيصلو معطل ڪري ڇڏيو. سپريم ڪورٽ ۾ چيف جسٽس قاضي فائز عيسيٰ جي سربراهيءَ ۾ پنج رڪني بينچ لاهور هائيڪورٽ جي اليڪشن ٽربيونلز جي جوڙجڪ بابت فيصلي تي اليڪشن ڪميشن جي درخواست جي ٻڌڻي ڪئي. ٻڌڻي دوران اليڪشن ڪميشن جي وڪيل سڪندر بشير چيو ته نياز الله نيازي جنهن جو وڪيل آهي، هن ڌر بڻجڻ جي درخواست داخل ڪئي هئي، عدالت ڌر بڻجڻ جي اپيل منظور ڪئي هئي. چيف جسٽس قاضي فائز عيسيٰ سلمان اڪرم کان سوال ڪيو ته ڇا اوهان مٿس اعتراض ڪيو هو؟ جنهن تي سلمان اڪرم جواب ڏنو ته هن پنهنجي ذاتي حيثيت ۾ اعتراض نه ڪيو هو. چيف جسٽس قاضي فائز عيسيٰ چيو ته عدالت کي تمام گهڻو اسڪينڊلائز ڪيو ويو آهي، هاڻي گهڻو ٿي ويو، ڇو نه نياز الله نيازي جو ڪيس ڊسيپلينري ايڪشن لاءِ پاڪستان بار کي موڪليو وڃي؟. چيف جسٽس قاضي فائز عيسيٰ چيو ته گذريل ٻڌڻي تي 2 رڪني بينچ جو سربراهه به هو ته پوءِ اعتراض ڇو نه ڪيو ويو؟ بينچ هاڻي هو اڪيلو نه پر سڄي ڪميٽي ٺاهيندي، جڏهن هڪ شخص بينچ ٺاهيندو هو ته ڪڏهن به ڪو اعتراض نه ڪيو ويو. جسٽس جمال مندوخيل چيو ته ڪميٽي کين بينچ ۾ ويهاريو آهي، ڇا هو هتي بي عزتي ڪرڻ لاءِ ويٺا آهن؟ هو 3 ميمبر بعد ۾ بينچ ۾ شامل ٿيا، بظاهر اعتراض مٿس آهي جنهن تي نياز الله نيازي جواب ڏنو ته کين ڪو به اعتراض ناهي. نياز الله نيازي چيو ته پهرين ٻڌڻي ۾ هو ڌر نه هئا، جيڪو شخص جيل ۾ آهي ان جو به اعتراض آهي، هو پنهنجي اصيل جي چوڻ تي اعتراض ڪري رهيو آهي. چيف جسٽس چيو ته جنهن شخص جو ذڪر ڪري رهيا آهيو اهو جيل مان وڊيو لنڪ تي پيش ٿي چڪو آهي ۽ هن بينچ تي ڪو به اعتراض ناهي ڪيو. چيف جسٽس چيو ته بينچ تي اعتراض اٿاري هيڊ لائين ٺاهڻ چاهيو ٿا، سپريم ڪورٽ کي اسڪينڊلائز ڪندڙ وڪيل جو لائسنس معطل ڪندا، ائين نٿو ٿي سگهي، جيڪو منهن ۾ اچي اهو چئي ڇڏيو، اوهان ماڻهو رڳو ڪيس خراب ڪرڻ چاهيو ٿا. عدالت نياز الله نيازي جا اعتراض رد ڪندي ڪيس بابت فيصلو محفوظ ڪري ورتو. عدالت ڪجهه دير بعد ئي فيصلو ٻڌائيندي اليڪشن ٽربيونل جي جوڙجڪ بابت لاهور هاءِ ڪورٽ جو فيصلو معطل ڪري ڇڏيو. عدالت پنهنجي حڪم ۾ چيو آهي ته لاهور هائيڪورٽ جي چيف جسٽس جي قسم کڻڻ جي فوري بعد اليڪشن ڪميشن ۽ ميمبر چيف جسٽس سان بامقصد مشاورت ڪن. عدالتي فيصلي ۾ وڌيڪ چيو ويو آهي ته ڪيس دير جو شڪار ڪيو ويو آهي، اليڪشن ڪميشن ۽ لاهور هائيڪورٽ جي چيف جسٽس وچ ۾ رابطو ناهي ٿيو، سپريم ڪورٽ معاملو هائيڪورٽ جي چيف جسٽس ۽ اليڪشن ڪميشن جي صلاح مشوري تي ڇڏي ڏنو.

پنجاب جي وزيراعليٰ مريم نواز چيو آهي ته قانون ٽوڙيندڙ ڪو به گروپ بچي نه سگهندو،  سوات ۾ توهين مذهب جي الزام کانپوءِ ٿيل واقعي تي سڀني کي ڳڻتي آهي، 2018ع ۾ سياسي پوائنٽ اسڪورنگ تحت مٿن تنقيد ڪئي وئي، هڪ سياسي پارٽي ڪجهه ماڻهن کي استعمال ڪري الزام هنيا. لاهور ۾ اتحاد بين المسلمين ڪانفرنس کي خطاب ڪندي چيو ته سوات ۾ جيڪو واقعو ٿيو، سڀني کي ڳڻتي آهي. سندس چوڻ هو ته جيڪڏهن ڪو ٽولو قانون کي پنهنجي هٿ ۾ کڻندو ته ڪير به نه بچندو. پنجاب جي وزيراعليٰ مريم نواز چيو ته سندس تعلق هڪ مذهبي گهراڻي سان آهي، دين سان محبت سندس رت ۾ شامل آهي. هن چيو ته 2018ع ۾ سياسي اسڪورنگ لاءِ کين نشانو بڻايو ويو، هنن ڳالهيون ۽ گاريون ٻڌيون، نواز شريف کي نشانو بڻايو ويو. پنجاب جي وزيراعليٰ مريم نواز چيو ته هڪ سياسي پارٽي ڪجهه ماڻهن جو استعمال ڪيو، کيس الزامن کي منهن ڏيڻو پيو.