برطانيا ۾ وقت کان اڳ عام چونڊن ۾  14 سالن کانپوءِ ليبر پارٽي اڪثريت سان ميدان ماري ورتو، حڪمران ڌر ڪنزرويٽو پارٽي کي بدترين شڪست بعد وزيراعظم رشي سوناڪ شڪست قبول ڪري ورتي، جنهن کانپوءِ سر ڪئير اسٽارمر برطانيا جو نئون وزيراعظم هوندو. برطانيه ۾ عام چونڊن جي نتيجن اچڻ جو سلسلو جاري آهي جڏهن ته 650 مان 644 سيٽن جا نتيجا پڌرا ٿيا آهن جنهن ۾ ليبر پارٽي 410 سيٽون کڻي سڀني کان اڳتي آهي. ڪنزرويٽو 120، ليبرل ڊيموڪريٽس 71، ريفارم پارٽي 9 سيٽون ۽ ٻين پارٽين 35 سيٽون حاصل ڪري ورتيون. حڪومت ٺاهڻ لاءِ پارليامينٽ جي 650 سيٽن مان 326 سيٽون گهربل هونديون آهن جڏهن ته ليبر پارٽي حڪومت ٺاهڻ جي پوزيشن ۾ اچي وئي آهي. بريڊ فورڊ ويسٽ مان ليبر اڳواڻ پاڪستاني ڄائي ناز شاهه ڪاميابي حاصل ڪئي جڏهن ته پاڪستان ڄائي ليبر ميمبر ياسمين قريشي ٽيون ڀيرو پنهنجي سيٽن جو بچاءَ ڪرڻ ۾ ڪامياب ٿي. ليبر پارٽي جي نوشابه خان، ڪنزرويٽو پارٽي جي اميدوار کي شڪست ڏئي ڇڏي جڏهن ته اڳوڻو ليبر اڳواڻ جيريمي ڪاربن به آئلنگٽن جي سيٽ تان آزاد اميدوار جي حيثيت ۾ ڪامياب ٿي ويو آهي. برطانوي وزيراعظم رشي سونڪ چونڊن ۾ شڪست تسليم ڪندي چيو آهي ته سندس مخالف ڌر پارٽي ليبر پارٽي ڪاميابي حاصل ڪئي آهي، هن سر ڪئير اسٽارمر کي ڪاميابي تي مبارڪ به ڏني. رشي سونڪ پنهنجي حامين کي خطاب ڪندي چيو ته ليبر پارٽي عام چونڊن ۾ ڪاميابي ماڻي آهي، هو سر ڪئير اسٽارمر کي سندس سوڀ تي مبارڪ ڏيڻ لاءِ فون ڪئي، اڄ اقتدار جي منظم انداز ۾ منتقلي ٿيندي. ليبر پارٽي جي سربراهه سر ڪئير اسٽارمر چونڊن ۾ ڪاميابي بعد پنهنجي سپورٽرن کي خطاب ڪندي چيو ته ملڪ جي عوام تبديلي جو ووٽ ڏنو، عوام فيصلو ٻڌائي ڇڏيو ته هو تبديلي لاءِ تيار آهن، وڏي مينڊيٽ سان گڏ عوام وڏي ذميواري به ڏني آهي، برطانوي عوام جي خدمت ڪندا.