سنڌ جي مختلف شهرن ۾ بي آءِ ايس پي سينٽرن تي مستحق عورتن جي وظيفي جي رقم مان ڪتوتي جو سلسلو رڪجي نه سگهيو آهي. مٺيءَ ۾ بينظير انڪم سپورٽ پروگرام ذريعي مستحق عورتن لاءِ ايندڙ وظيفي واري قسط مان ڊوائيز مالڪن پاران ڪٽوتي  ڪئي وئي. سنڌ سمال انڊسٽري ڪالوني ۾ قائم سينٽر تي سهولتن جي اڻهوند سبب وظيفي جي رقم وٺڻ لاءِ آيل  عورتون ڏکيائن کي منهن ڏيڻ تي مجبور ٿي ويون. مستحق عورتن موجب في ڪارڊ تي 5 سئو کان هزار رپين تائين ڪٽوتي ڪئي وڃي ٿي. عورتن ٻڌايو ته سينٽر تي پاڻي ۽ بجلي جي سهولت نه هجڻ ڪري  پريشانين کي منهن ڏيڻو پوي ٿو. هنن چيو ته رقم ڪٽوتي ڪندڙ ڊوائيز مالڪن خلاف ڪاروائي ڪري بند پيل ڊوائيز کولرايا وڃن. اسلام ڪوٽ جي ھاءِ اسڪول ۾ قائم ڪيل سينٽر ۾ پيئڻ جي پاڻي سميت ٻيون سهولتون نه هجڻ سبب مستحق عورتون پريشانين کي منهن ڏيڻ تي مجبور ٿي ويون. بي آءِ ايس پي سينٽر تي سهولتن جي اڻهوند بابت اسسٽنٽ ڪمشنر توڙي ٽائون انتظاميه تحرڪ نه ورتو. سينٽر تي موجود عورتن دانهيو ته  صبح کان وٺي قطار ۾ بيٺل آھن، پر ڊوائز وارا چون ٿا انٽرنيٽ نٿو ھلي، ڄاڻي واڻي پريشان ڪيو پيو وڃي. ٺاروشاھ ۾ بينظيـر انڪم سپورٽ پـروگرام جـي آيـل قسط ٽائون ڪـاميٽي ۾ ٻئي ڏينهن به ڊوائيس نه هلڻ سبب مستحق عورتون سخـت گرمـي ۾ دربدر ٿي ويون. سھولتـن جي کوٽ، ٿڌو پاڻي ۽ بجلي جو بندوبست نـ ھئڻ ڪـري ڪيـتريـون ئـي عـورتون بيھـوش ٿـي ويـون. عورتن ڀاڳل تيوڻو، مسمات سوني ابڙو، عنايت خاتون ۽ ٻين چـيو تـ قائم ڪيئمپ ۾ ڪـا بـ سھولت نه ھئڻ ڪـري پريشانين کي منهن ڏيڻ تي مجبـور آھن. ھنن چيو ته  پوليس وارا زبردستي کين ٻاهر ڪڍن  ٿا، سينٽر اندرڪيترائي ٻاهريان ماڻھو غير قانوني طور اچن ٿا،  انهن کي ڪير به روڪڻ وارو  نه آھي، سخت گرمي ۽ پيهه سبب ڪيتريون ئي پيرسن عورتون بيھوش ٿي ويون آھن. عورتن مطالبو ڪندي چيو تـ فوري طور سھولتن جـي کوٽ پوري ڪـري پريشانين کان بچايو وڃي. ڪنري جي بي آءِ ايس پي سينٽر تي مستحق عورتن کي وظيفي جي رقم نه ملي سگهي، جنهن ڪري ڏورانهن علائقن کان آيل عورتون پريشان ٿي ويون. عورتن جو چوڻ هو ته ٻن ڏينھن کان پئسا وٺڻ اچن پيون پر رقم نٿي ملي. هنن چيو ته انتظاميه کائن ڪارڊ وٺي پاڻ وٽ رکي ڇڏيا آھن، ٽوڪن سسٽم جو جواز ڄاڻائي بنا جواز پريشان ڪيو پيو وڃي. سندن چوڻ هو ته سينٽر تي ڪابه سهولت ناهي، پري پري جي علائقن مان معصوم ٻارن سميت ايندڙ عورتون سخت عذاب ڀوڳي رهيون آهن، فوري طور نوٽيس وٺي رقم جي ورڇ بھتر نموني شروع ڪئي وڃي. بي آءِ ايس پي انچارج موجب پاليسي تحت ٽوڪن سسٽم رکيو ويو آھي، کين ٽوڪن ذريعي رقم ڏيڻي آھي. مديجي ۾ بينظير انڪم سپورٽ پروگرام جي لڳل ڪئمپ تي مستحق عورتن کان ڪٽوتي ڪئي وئي. گورنمينٽ گرلز اسڪول ۾ قائم بي آءِ ايس پي ڪئمپ تي مستحق عورتن جي رقم مان ڊوائيز هولڊر، مدئجي پوليس ۽ ڪئمپ انچارج جي ملي ڀڳت سبب 15 سئو کان 2 هزار روپيه ڪٽوتي ڪئي وئي. ڪئمپ تي آيل مستعق عورتن ٻڌايو ٽوڪن بهاني ڊوائيس هولڊر ۽ ايجنٽ 15 سو کان 2 هزار ڪٽوتي ڪري پئسا ڪڍي رهيا آھن، معاملي جو نوٽيس وٺي ڪارروائي ڪئي وڃي..

سنڌ جي سينيئر وزير شرجيل انعام ميمڻ جي صدارت هيٺ ييلو لائين بي آر ٽي ۽ ريڊ لائين بي آر ٽي بابت ٻه اعليٰ سطحي اجلاس ٿيا. اجلاس ۾ ريڊ لائن جي لاٽ ون ۽ لاٽ 2، بايو گيس، ڊپو تي هلندڙ ڪم جو جائزو ورتو ويو. سينيئر صوبائي وزير شرجيل ميمڻ جو چوڻ هو ته هلندڙ ڪم کي تيز ڪيو وڃي ۽ ڏينهن رات ڪم ڪيو وڃي، ڪم بابت اسٽيڪ هولڊرز کي روزاني جي بنياد تي رپورٽ پيش ڪرڻ جي هدايت پڻ ڪئي وئي. شرجيل ميمڻ چيو ته منصوبا جلد مڪمل ڪرڻ حڪومت جي اولين ترجيحن ۾ شامل آهن. سندس چوڻ هو ته بي آر ٽيز تي ڪم ۾ تيزي آندي وڃي، ڏينهن رات ڌار ڌار شفٽن ۾ ڪم ڪري بي آر ٽيز کي مڪمل ڪرڻ فوري طور يقيني بڻايو وڃي. شرجيل ميمڻ چيو ته بي آر ٽيز تي ڪم کي فوري طور مڪمل ڪرڻ لاءِ سمورا اسٽيڪ هولڊر روزاني جي بنياد تي رپورٽ ڏين. هن چيو ته ريڊ لائن ڊيپو جي تياري جو ڪم به تيز ڪيو وڃي، ڪم جي معيار تي ڪابه سوديبازي نه ڪئي ويندي. شرجيل ميمڻ جو چوڻ هو ته بي آر ٽيز تي ڪم ۾ وڌيڪ تيزي آندي وڃي، حڪومت چاهي ٿي ته عوام کي بي آر ٽي مان جلد فائدو ملي سگهي……..