وزيراعظم شهباز شريف طرفان دهشتگردن خلاف ڪامياب آپريشن تي سڪيورٽي فورسز کي ڀيٽا، سندس چوڻ آهي ته سڪيورٽي فورسز ڪامياب آپريشن ڪري نون دهشتگردن کي ماريو آهي، پاڪستاني محافظن جو ملڪ جي امن لاءِ  مضبوط عزم ساراهه جوڳو آهي، قوم دهشتگرديءَ جي خاتمي لاءِ پاڪ فوج سان گڏ بيٺل آهي.

پ پ جي صوبائي وزير سعيد غني چيو آهي ته ايم ڪيو ايم جي بيوس اڳواڻ  خالد مقبول صديقي نفرت جي سياست ڪئي. سعيد غني جو چوڻ هو ته ٽارگيٽ ڪلنگ جا واقعا هڪ ڀيرو ٻيهر شروع ٿي ويا آهن، هنن سمجهيو ته ايم ڪيو ايم هاڻي نفرت واري سياست نه ڪندي. سعيد غني چيو ته ڪالهه ڪورنگي ۾ سندن ڪائونسلر عامر عباسي کي ٽارگيٽ ڪلنگ ۾ قتل ڪيو ويو آهي، هو قاتلن تائين پهچندا، سياسي ڪارڪنن جي  ٽارگيٽ ڪلنگ سٺي ڳالهه نه آهي. سعيد غني جو چوڻ هو ته هنن سمجهيو ته اهي ڪا نئين ڳالهه ڪندا پر اهي ڪٿي نه ڪٿي زهر اوڳاڇي ڇڏيندا آهن. سعيد غني چيو ته ايم ڪيو ايم اڃا نفرت واري سياست کان ڌار نه ٿي آهي، هنن ايم ڪيو ايم باني کان نفرت واري سياست جو سبق سکيو آهي، هنن مختلف ٻوليون ڳالهائڻ وارن کي پاڻ ۾ ويڙهايو. هن چيو ته پ پ گذريل حڪومت ۾ نوڪرين جا اشتهار جاري ڪيا هئا، ايم ڪيو ايم جي خواهش هئي ته ڀرتي ڪميٽي ۾ کين شامل ڪيو وڃي. سعيد غني چيو ته سنڌ هاءِ ڪورٽ ڀرتين جي ٽيسٽ لاءِ آءِ بي اي جي چونڊ ڪئي، سکر آءِ بي اي جهڙي بهترين اداري کي تڪراري بڻايو ويو آهي، ايم ڪيو ايم ڀرتين واري ڪيس تي جشن ملهائي رهي آهي.

وزيراعظم شهباز شريف اڄ کان ٻن ڏينهن جو تاجڪستان جو دورو ڪندو. وزيراعظم هائوس طرفان جاري پڌرائي موجب، وزيراعظم شهباز شريف تاجڪ صدر جي دعوت تي 2 ۽ 3 جولاءِ تي تاجڪستان جو دورو ڪندو. پڌرائي موجب وزيراعظم شهباز شريف دوشنبيَ ۾ تاجڪستان جي اعلى قيادت سان ملاقاتون ڪندو. وزيراعظم شهباز شريف تاجڪستان جي صدر ۽ وزيراعظم کان علاوه تاجڪ پارليامينٽ جي ايوان جي چيئرمين سان ملاقات ڪندو. پڌرائي ۾ ٻڌايو ويو ته وزيراعظم جو دورو ٻنهي ملڪن وچ ۾ اعلى سطح جي وفد جي ملاقات جو هڪ حصو آهي. پڌرائي موجب، پاڪستان ۽ تاجڪستان وچ ۾ واپار، توانائي سميت ٻين شعبن م سهڪار تي ڳالهيون ٿينديون. ٻئي پاسي پرڏيهي آفيس جـِي ترجمان موجب، وزيراعظم شهباز شريف 3 ۽ 4 جولاءِ تي قازقستان جو به دورو ڪندو. ترجمان موجب وزيراعظم شهباز شريف ايس سي او ڪونسل آف هيڊز آف اسٽيٽ جي ٻن سربراهي اجلاسن ۾ شرڪت ڪندو….

خيبرپختونخوا ۾ سڪيورٽي فورسز جا ٻه ڌار ڌار آپريشن، 9 دهشتگرد مارجي ويا. ڊي جي آءِ ايس پي آر طرفان جاري ڪيل بيان ۾ چيو ويو ته سڪيورٽي فورسز تيره واري علائقي ۾ ڳجهي ڄاڻ جي بنياد تي آپريشن ڪيو. پاڪ فوج جي ترجمان چيو ته آپريشن دران گهربل دهشتگرد نجيب عرف عبدالرحمان ۽ اشفاق عرف معاويه سميت 7 دهشتگرد مارجي ويا. آءِ ايس پي آر موجب مارجي ويل دهشتگردن وٽان هٿيار ۽ بارودي مواد هٿ ڪيو ويو، دهشتگرد سڪيورٽي فورسز تي حملن ۽ قانون لاڳو ڪندڙ ادارن جي اهلڪارن تي حملن ۾ ملوث هئا. پاڪ فوج جي ترجمان چيو ته سڪيورٽي فورسز ٻيو آپريشن لڪي مروت ۾ ڪيو، جنهن دوران 2 دهشتگرد مارجي ويا. آءِ ايس پي آر موجب سڪيورٽي فورسز هر قميت تي دهشتگردي جي خاتمي لاءِ پرعزم آهي.

پ پ چيئرمين بلاول ڀٽو زرداري چيو آهي ته اقتدار لاءِ غير جمهوري قدم کڻڻ پي ٽي آءِ جي عادت آهي، خيبرپختونخوا ۾ صحافين تي ظلم خلاف پيپلزپارٽي قلم ڌڻين سان گڏ آهي. جاري ڪيل بيان ۾ بلاول ڀٽو زرداري چيو ته اقتدار خاطر ڪرڻ لاءِ پي ٽي آءِ جي ڪا به حد ناهي، پيپلزپارٽي آزاد صحافت تي يقين رکي ٿي، ڪنهن کي به صحافت کي دٻائڻ جي اجازت نه ڏني ويندي. هن چيو ته خيبرپخونخوا ۾ صحافين جي تحفظ ۽ صحافت جي آزاديءَ لاءِ لاڳاپيل ادارا ۽ پارليامينٽ پنهنجو ڪردار ادا ڪن. پ پ چيئرمين چيوته ڪي پي ۾ آزاد صحافت لاءِ  ڏکيائين تي ڳڻتي آهي، ظلم ذريعي صحافت کي دٻائڻ انتهاپسندن جي عادت هوندي آهي، پي ٽي آءِ آزاد صحافت سان ڊنل ۽ عوام کان مايوس آهي.