پاڪستان ۽ افغان عبوري حڪومت وچ ۾ هڪ ڀيرو ٻيهر باضابطا رابطو ٿيو آهي. گڏيل قومن  جي اهتمام هيٺ افغان ڪانفرنس ۾ شريڪ افغان وفد پاڪستاني وفد سان ملاقات ڪئي، افغان وفد جي ڀارتي وفد سان اڳ ئي ملاقات ٿي هئي. پاڪ افغان وفدن جي ملاقات قطر ۾ پاڪستان سفير جي رهائشگاهه تي ٿي، جنهن ۾ پاڪستاني وفد جي سربراهي آصف دراني ۽ افغان طالبان حڪومت جي ترجمان ذبيح الله مجاهد موجود هو. پاڪستاني سفير افغان وفد جي اعزاز ۾ آجياڻو پڻ ڏنو. پاڪستاني سفير جو چوڻ هو ته پاڪستان ۽ افغانستان وچ ۾ گهڻي هڪجهڙائي آهي، امن جي خواهش ٻنهي طرفن کان آهي. ذريعن موجب دوحا ۾ پاڪ افغان وفدن جي ملاقات هاڪاري رهي، افغان وفد ڪانفرنس ۾ افغان موقف جي حمايت تي پاڪستان جا ٿورا مڃيا.

وزيراعظم شهبازشريف چيو آهي ته پاڪ تاجڪ واپاري ڪاٿو سندن ويجهن لاڳاپن جو آئينو ناهي، واپاري ڪاٿي ۾ اضافي لاءِ کين سالياني بنيادن تي حدف مقرر ڪرڻا پوندا. دوشنبي ۾ تاجڪ صدر امام علي رحمان سان گڏ پريس ڪانفرنس ڪندي وزيراعظم شهبازشريف چيو ته تاجڪستان ۾ سندن شاندار آجيان ڪئي وئي. هن چيو ته ٻنهي ملڪن وچ ۾ مفاهمتي يادداشتن تي صحيون سندن ٻطرفن لاڳاپن جي مضبوطيءَ جو سبب بڻجنديون. وزيراعظم چيو ته زراعت، صحت، تعليم، سيڙپڪاري ۽ واپار کي هٿي ڏيڻ لاءِ ڪم ڪيو ويندو. شهبازشريف چيو ته تاجڪ واپاري ڪاٿو سندن ويجهن لاڳاپن جو آئينو ناهي، واپاري ڪاٿي ۾ اضافي لاءِ کين سالياني بنيادن تي حدف مقرر ڪرڻا پوندا. وزيراعظم چيو ته امن کانسواءِ خوشحالي ممڪن ناهي، دهشتگردي خلاف جنگ ۾ ڪاميابي حاصل ڪئي. شهبازشريف چيو ته دنيا ۾ امن لاءِ فلسطين ۾ امن ضروري آهي. ان کان اڳ وزيراعظم شهبازشريف پاڪستاني وفد سان گڏ تاجڪستان جي ٻن ڏينهن جي دوري  تي دوشنبيَ پهتو، جتي تاجڪ وزيراعظم قاهر رسول زاد ۽ ٻين وزيراعظم جي آجيان ڪئي. هوائي اڏي تي وزيراعظم شهبازشريف پنهنجي تاجڪ هم منصب سان ملاقات ڪئي ۽ مختلف معاملن تي ڳالهيون ڪيون. شهبازشريف دوشنبيَ اسماعيل ساماني جي يادگار تي پهچي گلن جي چادر چاڙهي. ان موقعي تي ڳالهائيندي وزيراعظم چيو ته اسماعيل ساماني وچ ايشيا جي تاريخي شخصيتن ۽ تاجسڪتان جو قومي هيرو آهي، جنهن نائين ۽ ڏهين صديءَ ۾ تاجڪستان ۽ خراسان جي علائقي تي حڪومت ڪئي ۽ تاجڪ قوم کي تاريخي ترقي راهه تي گامزن ڪيو. شهبازشريف تاجڪستان کانپوءِ قازقستان جو دورو به ڪندو، نائب وزيراعظم اسحاق ڊار،  خواجه آصف، عطا تارڙ ۽ طارق فاطمي به وزيراعظم سان گڏ آهن….

حڪومت يو اين او جو اعتراض رد ڪندي پي ٽي آءِ بانيءَ جي گرفتاري ۽ ڪيس اندروني معاملو قرار ڏنو آهي. جنيوا ۾ قائم گڏيل قومن جي صوابديد حراست بابت ورڪنگ گروپ طرفان پي ٽي آءِ بانيءَ جي گرفتاريءَ جي مذمت ۽ ڪيس کي بناجواز قرار ڏيڻ تي حڪومت جو رد عمل  سامهون آيو آهي. قانون واري وفاقي وزير اعظم نذير تارڙ چيو ته پاڪستان خودمختيار رياست آهي جتي عدالتن ذريعي آئين ۽ قانون تي عمل ٿيندو آهي. هن چيو ته پي ٽي آءِ باني کي ملڪي آئين ۽ قانون توڙي عالمي اصولن موجب سمورا حق حاصل آهن، هو هڪ سزا ڪاٽيندڙ قيدي طور جيل ۾ آهي. اعظم نذير تارڙ چيو ته ڪيترن ئي ڪيسن ۾ پي ٽي آءِ بانيءَ کي رليف ملڻ شفاف ۽ منصفاڻي ٽرائل ۽ عدالتي نظام جو ثبوت آهي. قانون واري وزير چيو ته آئين، قانون ۽ عالمي اصولن کان مٿانهون ڪو به مطالبو عدل ۽  اڻڌرائپ جي ابتڙ  آهي.