پاڪستان 59 ورهين کان ڀارتي جيلن ۾ قيد پنهنجا 38 شهري ڀارت کان گهري ورتا آهن. پرڏيهي ترجمان طرفان جاري ڪيل بيان ۾ چيو ويو ته پاڪستان ڀارت کي ڏنل قيدين جي لسٽ ۾ انهن اهلڪارن جو مطالبو ڪيو. پاڪستان ۽ ڀارت پهرين جولاءِ تي قيدين جي لسٽ هڪٻئي کي ڏيندا آهن، هندستان جي جيلن ۾ 452 پاڪستاني قيد آهن، ڀارت 254 قيدين ۽ مهاڻن جي لسٽ  حوالي ڪئي. پرڏيهي ترجمان چيو ته پاڪستان ۽ ڀارت سفارتي چينل ذريعي هڪٻئي جي تحويل ۾ قيدين جي لسٽن جي مٽاسٽا ڪئي،  لسٽن جي مٽاسٽا 2008ع واير قونصلر پهچ معاهدي تحت ٿيندي آهي. ترجمان چيو ته گم ٿيل اهلڪارن بابت خيال آهي ته اهي 1965ع ۽ 1971ع جي جنگين کانپوءِ ڀارت جي قبضي ۾ آهن.

اسلام آباد جي عدالت ڪي پي جي وڏي وزير علي امين گنڊا پور ۽ پي ٽي آءِ اڳواڻ عامر مغل جي حاضري کان ڇوٽ بابت درخواست رد ڪندي ٻنهي جا ضمانت نه ٿيڻ جوڳا گرفتاري وارنٽ جاري ڪري ٻڌڻي 8 جولاءِ تائين ملتوي ڪري ڇڏي. اسلام آباد جي دهشتگردي ٽوڙ عدالت جي جج طاهر عباس سپرا تحريڪ انصاف باني ۽ ٻين خلاف سنگجاڻي ۽ آءِ نائن ۾ داخل ڪيسن جي ٻڌڻي ڪئي. ٻڌڻي دوران علي نواز اعواڻ، واثق قيوم، عامر ڪياني ۽ ٻيا جوابدار عدالت ۾ پيش ٿيا جڏهن ته ڪي پي جي وڏي وزير علي امين گنڊاپور ۽ پي ٽي آءِ اڳواڻ عامر مغل طرفان حاضري کان ڇوٽ بابت درخواست داخل ڪرائي وئي. جج طاهر عباسي سپرا رمارڪس ڏيندي چيو ته ڪنهن جي حاضري کان ڇوٽ بابت درخواست قبول نه ٿيندي، اهو ڪو سبب ناهي ته شهر کان ٻاهر آهيان پيش نٿو ٿي سگهان. تحريڪ انصاف جي وڪيلن جواب ڏيندي چيو ته حاضري پوري ڪرڻ جوابدارن تي آهي پر جج چيو ته سمورن غير حاضر جوابدارن جا گرفتاري وارنٽ جاري ٿيندا، ايندڙ ٻڌڻي تي سمورن جوابدارن جي حاضري يقيني هوندي. جج طاهر عباس سپرا چيو ته سمورن غير حاضر جوابدارن جا ضمانت نه ٿيڻ جوڳا گرفتاري وارنٽ جاري ڪن ٿا، ايندڙ ٻڌڻي تي حاضري جي مڪمل خاطري ڪرائي وڃي ته پوءِ وارنٽ جو معاملو ڏٺو ويندو. عدالت ٻنهي ڪيسن جي ٻڌڻي 8 جولاءِ تائين ملتوي ڪري ڇڏي. جج طاهر عباس سپرا چيو ته 8 جولاءِ تائين پيش نه ٿيندڙ جوابدارن کي اشتهاري قرار ڏنو ويندو، 8 جولاءِ بعد ڪيسن جي ٻڌڻي روزانو جي بنياد تي ٿيندي. عدالت تحريڪ انصاف باني جي وڊيو لنڪ پيشي بابت اڊيالا جيل جي سپرينٽينڊنٽ کان لکت ۾ جواب به طلب ڪري ورتو.

سنڌ جي سينئر صوبائي وزير شرجيل انعام ميمڻ چيو آهي ته سنڌ سرڪار  برساتي ٻوڏ متاثرن لاءِ سنڌ پيپلز هائوسنگ اسڪيم جي عظيم مقصد جي حمايت ۾ پاڪستان جي پهرين نيلامي ڪئي. اڳوڻي صدر  عارف علوي جي ٽوئيٽ جي جواب ۾ شرجيل ميمڻ چيو ته نيلامي ذريعي 2 لک 251 گهرن جي اڏاوت لاءِ فنڊ گڏ ڪيا ويا آهن. هن چيو ته ڇا عارف علوي واضح ڪري سگهي ٿو ته سندن ليڊر عمران خان برساتي ٻوڏ متاثرن لاءِ جمع ڪيل پنج ارب رپين مان ڪيترن خاندانن جي مدد ڪئي. سندس چوڻ هو ته لڳي ٿو ته سمورا فنڊ پاڪستان جي ادارن خلاف سوشل ميڊيا مهم ۾ لڳي ويا آهن، جيڪا ضرورتمند ماڻهن جي مدد ڪرڻ بدران ڏڦيڙ پيا پکيڙين. شرجيل ميمڻ چيو ته عمران خان زڪوات جي فنڊن کي ريئل اسٽيٽ وينچر طرف موڙي ڇڏيو آهي،  هاڻي هو مني لانڊرنگ ۽ پرڏيهي فنڊنگ جي ڪيسن کي منهن ڏئي رهيو آهي………………

خيبر جي تخته بيگ پوليس ۽ فرنيٽئر ڪور جي گڏيل چيڪ پوسٽ تي دهشتگردن جي حملي ۾ 2 اهلڪار شهيد ٿي ويا، پوليس جي جوابي فائرنگ ۾ دهشتگرد فرار ٿي ويا. رات دير سان تخته بيگ پوليس ۽ فرنيٽئر ڪور جي گڏيل چيڪ پوسٽ تي دهشتگردن حملو ڪيو. ڊي پي او موجب، چيڪ پوسٽ تي حملي ۾ فائرنگ سبب هڪ پوليس ۽ هڪ ايف سي اهلڪار زخمي ٿي پيا جن کي سي ايم ايچ پشاور منتقل ڪيو ويو جتي هنن دم ڏئي ڇڏيو. ڊي پي ايو موجب، چيڪ پوسٽ تي حملي دوران ڌماڪن ۽ فائرنگ جي رد عمل ۾ جوابي ڪارروائي ڪئي، جنهن دوران دهشتگرد فرار ٿي ويا. واضع رهي ته پوليس ۽ فرنيٽئر ڪور جي گڏيل چيڪ چيڪ پوسٽ تخته بيگ پوسٽ جمرود بازار ڀرسان پاڪ افغان شاهراهه تي موجود آهي…