پي ٽي آءِ باني ۽ بشريٰ بي  بي خلاف 190 ملين پائونڊ ريفرنس جو فيصلو اڄ ٻڌايو ويندو

پي ٽي آءِ باني ۽ سندس گهرواري بشريٰ بي  بي خلاف 190 ملين پائونڊ ريفرنس جو فيصلو اڄ ٻڌايو ويندو. ذريعن موجب عدالتي عملي پي ٽي آءِ باني جي وڪيلن کي آگاهه ڪري ڇڏيو آهي. ذريعن جو چوڻ آهي ته احتساب عدالت جو جج ناصر جاويد رانا اڄ جمعي ڏينهن ساڍي يارهين وڳي 190 ملين پائونڊ ريفرنس جو محفوظ ڪيل فيصلو ٻڌائيندو. ياد رهي ته 190 ملين پائونڊ ريفرنس جو فيصلو 3 ڀيرا ملتوي ٿي چڪو آهي. 190 ملين پائونڊ ريفرنس تي احتساب عدالت فيصلو 18 ڊسمبر 2024 تي محفوظ ڪيو هو، احتساب عدالت فيصلو ٻڌائڻ لاءِ پهريان 23 ڊسمبر ۽ ان کانپوءِ 6 جنوري جي تاريخ مقرر ڪئي هئي. عدالت ٽيون ڀيرو 13 جنوري جي تاريخ ڏني، ان ڏينهن به فيصلو نه ٻڌايو ويو ۽ ملتوي ڪيو ويو.