حماس، ڊونلڊ ٽرمپ جي فلسطينين کي سندن سرزمين کان پري ڪرڻ جي ڪنهن به منصوبي کي رد ڪري ڇڏيو

فلسطين جي مزاحمتي تنظيم حماس، امريڪي صدر ڊونلڊ ٽرمپ جي فلسطينين کي سندن سرزمين کان پري ڪرڻ جي ڪنهن به منصوبي کي رد ڪري ڇڏيو. گذريل ڏينهن امريڪي صدر ڊونلڊ ٽرمپ غزه جي پناهگيرن کي مصر ۽ اردن ۾ آباد ڪرڻ جي خواهش ظاهر ڪئي ۽ اردن ۽ مصر کي  غزه جي لکين فلسطينين کي پناهه ڏيڻ لاءِ چيو. ٽرمپ پنهنجي بيان ۾ چيو ته غزه ۾ سب ڪجهه تباهه ٿي چڪو،عرب ملڪن سان گڏجي الڳ هنڌ رهائشي منصوبو چاهين ٿا، منتقلي عارضي يا مستقل به ٿي سگھي ٿي. پرڏيهي ميڊيا رپورٽن موجب، ٽرمپ جي بيان تي حماس جواب ۾ چيو ته فلسطينين کي سندن سرزمين کان پري ڪرڻ جي ڪنهن به منصوبي کي رد ڪن ٿا. حماس آمريڪا کان مطالبو ڪيو ته اهي تجويزون روڪيون وڃن جيڪي صيهوني منصوبن سان مطابقت رکن ٿيون، هو اهڙن سڀني قدمن کي رد ڪن ٿا جيڪي سندن ماڻهن جي حقن ۽ آزادين سان ٽڪراءَ ۾ اچن ٿا. حماس طرفان جاري بيان ۾ چيو ويو ته فلسطيني عوام نسل ڪشي جي انتهائي اسرائيلي ڪاررواين ۾ ثابت قدم رهيا، فلسطينين صيهوني قابض فوج آڏو هٿيار ڦٽا ڪرڻ کان انڪار ڪيو، سندن مطالبو آزاد فلسطين جو قيام آهي جنهن جو راڄڌاني بيت المقدس هجي. ٻئي پاسي اردن به غزه مان فلسطينين جي بي دخلي منصوبي کي رد ڪري ڇڏيو آهي.