حماس ڇنڇر تائين يرغمالي نه ڇڏيا ته جنگبندي ختم ڪري ٻيهر حملا ڪنداسين: اسرائيلي وزيراعظم

اسرائيلي وزيراعظم بن يامين نيتن ياهو، ڌمڪي ڏني آهي ته جيڪڏهن فلسطيني ويڙهاڪ تنظيم حماس ڇنڇر تائين يرغمالي سندن حوالي نه ڪيا ته جنگبندي ختم ٿي ويندي ۽ هو ٻيهر حملا ڪرڻ شروع ڪندا. سماجي رابطن واري سائيٽ “ايڪس” تي رکيل پنهنجي پوسٽ ۾ اسرائيلي وزيراعظم بن يامين نيتن ياهو چيو ته جيڪڏهن حماس ڇنڇر ڏينهن منجهند تائين سندن اغوا ٿيل ماڻهو واپس نه ڪيا ته جنگبندي ختم ٿي ويندي ۽ اسرائيلي فوج ڇتي ويڙهه شروع ڪري ڏيندي، جيڪا حماس کي مڪمل طور تي شڪست ڏيڻ تائين جاري رهندي. اسرائيلي وزيراعظم جو اِها ڌمڪي سياسي- سڪيورٽي ڪابينا جي چار ڪلاڪ جاري رهندڙ اجلاس کانپوءِ سامهون آئي آهي. نيتن ياهو جو چوڻ هو ته ڪابينا اتفاق راءِ سان هڪ معاهدي جي منظوري ڏني آهي ته جيڪڏهن حماس ڇنڇر ڏينهن منجهند تائين سندن يرغمالي واپس نه ڪيا ته جنگبندي ختم ڪئي ويندي. ان کان اڳ آمريڪي صدر دونلد ٽرمپ به حماس کي ساڳئي قسم جي ڌمڪي ڏئي چڪو آهي. آمريڪي ۽ اسرائيلي سربراهن جي انهن بيانن کان اڳ حماس پاران چيو ويو هو ته اسرائيل جنگبندي معاهدي جي ڀڃڪڙي ڪئي آهي تنهنڪري هو وڌيڪ ٽن يرغمالين کي آزاد ڪرڻ وارو فيصلو ملتوي ڪندا.