سنڌ سرڪار ٽيڪس چورن ۽ منشيات وڪرو ڪندڙن جو گهيرو تنگ ڪرڻ سميت ٽيڪس چورن جا نالا اخبارن ۾ شايع ڪرڻ جو فيصلو ڪيو آهي.
سنڌ جي سينيئر وزير شرجيل ميمڻ جي صدارت هيٺ اعليٰ سطحي اجلاس ٿيو.
اجلاس ۾ ايڪسائيز ٽيڪسيشن ۽ نارڪو ٽيڪس ڪنٽرول جي سيڪريٽري سليم راجپوت، ڊي جي اورنگزيب پنهور، ڊائريڪٽرز ۽ ٻين آفيسرن شرڪت ڪئي.
ان موقعي تي شرجيل ميمڻ چيو ته ٽيڪس چور ملڪ جي خوشحالي جا دشمن آهن، کين ڪنهن به صورت ۾ بخش نه ڪيو ويندو، ٽيڪس چورن جا نالا اخبارن ۾ شايع ٿيندا، اڪائونٽ فريز ڪرڻ لاءِ به ڪوششون ڪيون وينديون.
سنڌ جي سينيئر وزير شرجيل ميمڻ سڄي صوبي ۾ منشيات وڪرو ڪندڙن خلاف جاري ڪريڪ ڊائون جي ساراهه ڪئي، ڪريڪ ڊائون دوران بهترين ڪارڪردگي ڏيکاريندڙن جي تعريف ۽ ڪريڪ ڊائون ۾ تيزي آڻڻ جي هدايت ڪئي.
سنڌ جي سينيئر وزير شرجيل ميمڻ چيو ته منشيات وڪرو ڪندڙ ملڪ ۽ قوم جي مستقبل جا دشمن آهن، ساڻن ڪنهن به قسم جي رعايت نه ڪئي ويندي، زيرو ٽالرنس پاليسي تحت سڄي سنڌ ۾ منشيات وڪرو ڪندڙن خلاف ڪارروايون جاري رکيون وڃن.
هن چيو ته منشيات وڪرو ڪندڙن ۽ ٽيڪس چوري ڪندڙن خلاف ڪاررواين لاءِ پوليس جي قابل آفيسرن ۽ جوانن کي ڊيپوٽيشن تي ايڪسائيز کاتي ۾ آندو ويندو.
سنڌ جي سينيئر وزير شرجيل ميمڻ چيو ته شروعاتي طور ڪراچي ۽ حيدرآباد ۾ پوليس آفيسر ڊيپوٽيشن تي ايڪسائيز کاتي ۾ آندا ويندا، منشيات خلاف ڪارروايون وڌيڪ تيز ڪرڻيون آهن، لاڳاپيل ادارا هر وقت سهڪار ڪن، منشيات وڪرو ڪندڙن جي پراسيڪيوشن ۽ انويسٽيگيشن مضبوط ڪئي وڃي.
اجلاس ۾ بهترين ڪارڪردگي ڏيکاريندڙ آفيسرن ۽ مخبرن کي انعام ڏيڻ جو به فيصلو ڪيو ويو.
اجلاس ۾ گاڏين جي رجسٽريشن ۽ منتقلي بائيو ميٽرڪ تحت ڪرڻ جي تجويز ڏني وئي.
ايڪسائيز کاتي سان لاپاڳيل سمورن اسٽيڪ هولڊرن جي شڪايتن جي ازالي لاءِ قدم کڻڻ جو فيصلو ڪيو ويو.