آءِ جي سنڌ غلام نبي ميمڻ چيو آهي ته پوليس ڏوهن جي خاتمي ۽ عوام کي تحفظ لاءِ پرعزم ۽ هر وقت تيار آهي، پوليس عوام کي يقين ڏياري ٿي ته ڏوهارين کي قانون جي ڪٽهڙي ۾ آندو ويندو.
آءِ جي سنڌ غلام نبي ميمڻ سال 2024ع دوران ڏوهن ۽ ڏوهاري عنصرن خلاف پوليس جي ڪاررواين، جوابدارن جي گرفتارين، ڪيسن جي جاچ ۾ ٿيل اڳڀرائي ۽ انجام تائين پهچندڙ ڪيسن تي ٻڌل تفصيلي رپورٽ جو جائزو ورتو.
اي آءِ جي آپريشنز سنڌ پاران پيش ڪيل رپورٽ موجب، هلندڙ سال ڦر دوران قتل جا 46 ڪيس داخل ٿيا، جن مان 27 ڪيسن کي پوليس پنهنجي محنت ۽ پيشوراڻي صلاحيت سان حل ڪري ڏوهارين کي انجام تائين پهچايو.
رپورٽ ۾ چيو ويو آهي ته واقعن ۾ مجموعي طور تي 48 شهري قتل ٿيا، 13 جوابدار مارجي ويا ۽ 33 جوابدار گرفتار ڪيا ويا، جڏهن ته قتل جي ٻين 12 مختلف ڪيسن مان پوليس پنهنجي ڪوششن سان 8 ڪيس حل ڪيا، پوليس رپورٽ پريس رليز سان ڳنڍي وئي آهي.
آءِ جي سنڌ غلام نبي ميمڻ عوام کي اپيل ڪئي آهي ته پوليس ۽ قانون لاڳو ڪندڙ ادارن جو ساٿ ڏين ۽ سهڪار ڪندي هو پنهنجي گهرن ۽ ڪاروباري هنڌن تي ڪئميرائون لڳائن ڏوهاري ڪيسن ۾ شاهدي لاءِ سهڪار ڪندي پوليس جا هٿ مضبوط ڪن.
هن چيو ته جتي ضرورت هجي اتي رضاڪاراڻي طور تي شاهدي ڏيڻ لاءِ پوليس سان سهڪار ڪن.
آءِ جي سنڌ غلام نبي ميمڻ چيو ته پوليس ڏوهن کي روڪڻ، جاچ ۽ جوابدارن کي سزا ڏيارڻ ۾ ڪابه ڪسر نه ڇڏيندي، پوليس ڏوهن کي روڪڻ لاءِ وڏيون قربانيون ڏنيون آهن.