آرمي چيف جنرل عاصم منير چيو آهي ته ملڪي معيشت ۾ ڪردار ادا ڪرڻ سندن معاشرتي ذميواري آهي، هو گڏجي ملڪ کي ڏکيائين مان ڪڍندا. پاڪستان منرل سمٽ کي خطاب ڪندي آرمي چيف جنرل عاصم منير چيو ته حڪومت سمورن ادارن سان گڏجي ايس آءِ ايف سي قائم ڪيو، جيڪو سمورن ڀائيوارن کي هڪ پليٽ فارم تي آڻي ٿو، جڏهن ته منرل سمٽ ملڪي ۽ پرڏيهي سيڙپڪارن لاءِ آسان ڪاروپبار جا نوان اصول واضح ڪري ٿو. هن چيو ته امن ۽ خوشحالي جي رستي تي هلڻ ئي استحڪام آهي، معدنياتي پراجيڪٽ عوامي ترقي جو رستو آهن. جنرل عاصم منير چيو ته قرآن پاڪ ۾ واضح آهي ته الله انهن جي مدد ڪري ٿو، جيڪي پنهنجي مدد پاڻ ڪن ٿا. آرمي چيف چيو ته ملڪ ۾ برف سان ڍڪيل جبلن کان وٺي ريگستان تائين ڇا ڇا ناهي؟ سامونڊي پٽي کان ميداني علائقن تائين ڌرتيءَ ڇا نه آهي. جنرل عاصم منير چيو ته سندن معاشرتي ذميواري آهي ته هو گڏجي ملڪي معيشت ۾ پنهنجو ڪردار ادا ڪن، اميد نه ڇڏڻ گهرجي. ان موقعي تي آرمي چيف بيرڪ گولڊ جي سي ايِ او ۽ صدر مارڪ برسٽو توڙي سعودي  مائننگ وزير انجنيئر خالد بن صالح ۽ ٻين سيڙپڪارن جا به ٿورا مڃيا.

فوجي عدالتن ۾ سويلين جي ٽرائل خلاف ڪيس ۾ سپريم ڪورٽ فل ڪورٽ جوڙڻ واري درخواست تي فيصلو محفوظ ڪري ورتو آهي، جيڪو سڀاڻي ٻڌايو ويندو. سپريم ڪورٽ ۾ چيف جسٽس عمر عطا بنديال جي سربراهيءَ ۾ 6 رڪني بئنچ عام شهرين جي فوجي عدالتن ۾ ٽرائل خلاف درخواستن تي ٻڌڻي ڪئي. ٻڌڻي دوران وڪيل فيصل صديقي دليل ڏيندي چيو ته  فل ڪورٽ جوڙڻ سان بئنچ تي اعتراض به ختم ٿي ويندو، درخواست ۾ واضح لکيل آهي ته هن وقت فل ڪورٽ جوڙڻ سان ڪيس متاثر نه ٿيندو. فيصل صديقي چيو ته اٽارني جنرل خاطري ڪرائي ته هن ڪيس دوران ڪنهن شهريءَ جو فوجي ٽرائل نه ٿيندو، ٽن ججن ڪيس ٻڌڻ کان معذرت ڪئي آهي، اهي فل ڪورٽ جو حصو نه ٿا بڻجي سگهن. جسٽس يحيٰ آفريدي چيو ته ٽن ججن ڪيس ٻڌڻ کان معذرت ناهي ڪئي، موجوده ڪيس ۾ رڳو هڪ جج ڪيس ٻڌڻ کان معذرت ڪئي. جسٽس مظاهر چيو ته اوهان هن وقت فل ڪورٽ جو مطالبو ڪري رهيا آهيو، جڏهن دليل مڪمل ٿي چڪا آهن. چيف جسٽس چيو ته درخواست ڏيندڙن کان به فل ڪورٽ تي موقف ورتو وڃي. درخواست ڏيندر اعتزاز احسن روسٽرم تي آيو ۽ چيو ته اهڙي قسم جي درخواستن جو دير سان اچڻ ڪيس جي مقصد کي خراب ڪرڻ برابر آهي، کيس هن بئنچ ۽ سپريم ڪورٽ تي مڪمل اعتماد آهي. هن چيو ته هو مارشل لا ۾ به عدالتن ۾ پيش ٿيندو رهيو آهي، عدالت کي ڪيس جو ترت فيصلو ڪري تڪرارن جو رستو بند ڪرڻ گهرجي. لطيف کوسا دليل ڏنا ته هو چاهن ٿا ته فل ڪورٽ ڪيس ٻـُـڌي پر اهو ٽيڪنيڪي بنيادن تي ممڪن ناهي، حڪومت طرفان ڪيس کي مذاق بڻايو ويو آهي، فل ڪورٽ جي درخواست رڳو وقت جو ذيان آهي. سلمان اڪرم راجا چيو ته اهو بهترين موقعو آهي ته سپريم ڪورٽ فوجي عدالتن بابت هڪ ئي ڀيرو فيصلو ڪري ڇڏي، ملڪي تاريخ ۾ پهريون ڀيرو اختيار عدالت جي هٿ ۾ آهي. سپريم ڪورٽ بار فل ڪورٽ بڻائڻ جي مخالفت ڪئي ۽ وڪيل عابد زبيري چيو ته بار کي به بئنچ تي مڪمل اعتماد آهي. ٻڌڻي دوران فيصل صديقي ۽ زمان وردگ کانسواءِ سمورن درخواست ڏيندڙن فل ڪورٽ جي مخالفت ڪئي، جڏهن ته پي ٽي آءِ چيئرمين طرفان به فل ڪورٽ جي مخالفت ڪئي وئي.  

وزيراعظم شهباز شريف چيو آهي ته نيب ماڻهن کي سياسي انتقام جو نشانو بڻائيندي رهي آهي. اسلام آباد ۾ منرل سمٽ جي افتتاحي اجلاس کي خطاب ڪندي وزيراعظم شهباز شريف چيو ته ڪرپٽ ماڻهن جي ڪرپشن کي نظرانداز ڪيو ويو، نيب ماڻهن کي سياسي انتقام جو بڻائيندي رهي. هن چيو ته بدقسمتي سان معاشرو ورهائجي چڪو آهي،  ماڻهن جي ذهنن ۾ زهر وڌو ويو آهي، موجوده صورتحال ۾ ملڪي ترقي لاءِ ڪم ڪرڻ ممڪن ناهي. سندس چوڻ هو ته ٿرڪول دنيا جي وڏن ڪوئلي جي منصوبن مان هڪ آهي، ريڪوڊڪ منصوبو ملڪي تاريخ ۾ خاص اهميت رکي ٿو، 75 سالن دوران پنهنجي قيمتي دولت تي ڌيان ئي نه ڏنو ويو آهي. وزيراعظم شهباز شريف چيو ته ماضي جي غلطين مان سبق سکي اڳتي وڌڻو آهي،  ڳالهيون گهڻيون ٿيون آهن، هاڻي ملڪي ترقي لاءِ ڪم ڪرڻو پوندو. هن چيو ته جنگ هاڻي ڪو به آپشن نه رهي آهي، پاڪستان ائٽمي طاقت آهي پر اها طاقت ڪنهن ملڪ خلاف استعمال ڪرڻ لاءِ ناهي. سندس چوڻ هو ته پاڙيسرين کي سمجهڻ گهرجي ته امن لاءِ رهڻ گهرجي ۽ مسئلن جي حل لاءِ  بامقصد ڳالهيون ڪيون وڃن. وزيراعظم شهباز شريف چيو ته  غربت جي خاتمي لاءِ ۽ عوام جي مفادن لاءِ ڪم ڪرڻ گهرجي.