سنڌ جي مختلف شهرن ۾ ڪٿي تيز ته ڪٿي هلڪي برسات جو وسڪارو ٿيو ، گهرن جي ڀتيون ۽ بجلي جا ٿنڀا ڪِرڻ سبب نينگري سميت 4 ڄڻا فوت ٿي ويا. ڪراچي جي بحريا ٽائون، گڏاپ، گلشن اقبال، گلستان جوهر، صدر، ڊفينس، ڪورنگي، ڪراسنگ، ڀٽائي ڪالوني، گدام چورنگي، مهراڻ ٽائون ۽ ٻين علائقن ۾ برسات سبب گرمي جو زور ٽٽي پيو، موسم خوشگوار ٿي وئي. حيدرآباد ۽ ڀرپاسي جي علائقن ۾ تيز هوا سان برسات جو وسڪارو ٿيو، جنهن سبب موسم خوشگوار ٿي وئي، جڏهن ته شهر جي ڪيترن ئي علائقن جي بجلي بند ٿي وئي. ميرپورخاص، عمرڪوٽ،   ٽنڊي  الهيار، مٺي، ڏيپلي، ڇاڇري، اسلام ڪوٽ، ڪلوئي، کپري، نبي سر روڊ، مٽياري، نيو سعيد آباد، هالا، اڏيري لال، ڄام نواز علي، ڄام صاحب ۽ ٻين شهرن ۾ برسات پئي. ٺٽي ۾ به ڪافي ڏينهن جي سخت گرمي بعد نيٺ بادل برسي پيا، ٺٽو، مڪلي، جھمپير، جنگشاھي، درگاھ ستيون، گجو، گھارو، ساڪرو، ور غلام الله، پير پٺو، بگهاڙ موري، گهوڙا ٻاري، سميت ڪوھستاني توڙي ساحلي پٽي ۾ تيز طوفاني ھوائن سان گڏ ڪٿي تيز ته ڪٿي ھلڪي برسات پئي، جنھن بعد گرمي جو زور ٽٽي ويو ۽ موسم پڻ خوشگوار ٿي ويئي. نوري آباد ۾ طوفان برسات دوران ٻن ٻارن جون جانيون ضايع ٿي ويون، جڏهن ته ڪيترن ئي گهرن جون ڇتيون اڏامي ويون. ڪوھستاني ڳوٺ شوڪت پالاري ۾ تيز طوفاني برساتن سبب 10 ڪچا گھر ڊھي پٽ پوڻ سميت بجلي جا ٿنڀا به ڪري پيا، بجلي جو ٿنڀو ڪِرڻ سبب معصوم ٻارڙو ڪبير ولد عطا محمد پالاري فوت ٿي ويو، جڏھن ته سندس ٽي ڀينرون سخت زخمي ٿي پيون، جن کي اسپتال منتقل ڪيو ويو. اهڙي طرح جوکيا موڙ وٽ کنوڻ ڪرڻ سبب نوجوان سلمان جوکيو فوت ٿي ويو، ٿاڻي بولا خان سميت ڪوهستان جي مختلف علائقن ۾ گجگوڙ سان برسات پئي، جنهن سبب ڍورا ۽ نيون وهي آيا، ميرپورخاص شهر سميت ڀرپاسي واري علائقن ۾ تيز هوا سان برسات ٿي، وسڪاري کانپوءِ مواصلاتي نظام ڊوانڊول ٿي ويو، جڏهن ته برسات بعد موسم خوشگوار ٿي وئي. ٽنڊي الهيار ۾ به هلڪي برسات ٿي، جنهن کانپوءِ گرمي جو زور گهٽجي ويو ۽ موسم وڻندڙ ٿي وئي، برسات بعد بجلي فراهمي معطل ٿي وئي. هوڏانهن ڳوٺ بيگن جروار ۾ برسات دوران گهر جي ڀت ڪرڻ ڪرڻ 50 ورهين جي کتو دٻجي فوت هڪ عورت زخمي ٿي پئي، زخمي عورت کي ڳڻتي جوڳي حالت ۾ حيدرآباد منتقل ڪيو ويو. عمرڪوٽ شهر ۽ ڀرپاسي وارن علائقن ۾ طوفاني برسات ٿي، تيز وسڪاري بعد گرمي جو زور ٽٽي ويو، جڏهن ته مواصلاتي نظام پڻ ڊنوانڊول ٿي ويو. ٿر ۾ برسات سبب ماروئڙن جي منهن تي مرڪون موٽي آيون آهن، ڏيپلي ۾ هڪ ڪلاڪ جي برسات سبب شهر جي مک روڊن سميت تعلقي اسپتال، الله والا چوڪ، بدين بس اسٽاپ، ڪلر پاڙي ۽ ٻين علائقن ۾ گوڏي جيڏو پاڻي بيهجي ويو، برسات سبب گرمي جو زور ٽٽي ويو ۽ موسم وڻندڙ ٿي وئي. ڪلوئي ۽ ڀرپاسي وارن علائقن ۾ ڪٿي هلڪي ته ڪٿي تيز برسات بعد گرمي جو زور ٽٽي ويو ۽ موسم خوشگوار ٿي وئي. ڇاڇري ۾ برسات دوران وڄ ڪرڻ جي ٻن ڌار ڌار واقعن ۾ هڪ ڄڻو زخمي ٿي پيو ۽ 2 ٻڪريون مري ويون. کپري ۽ ڀرپاسي وارن علائقن ۾ ڪٿي تيز ته ڪٿي هلڪي برسات سبب موسم خوشگوار ٿي وئي، هيٺانهين وارن علائقن ۾ پاڻي بيهجي ويو. ڪنري ۽ ڀرپاسي وارن علائقن ۾ سانوڻي جي وسڪاري بعد گرمي جو زور ٽٽي ويو ۽ موسم وڻندڙ ٿي وئي. سرهاڙي ۽ ڀرپاسي وارن علائقن ۾ مٽيءَ جي طوفان بعد تيز برسات سبب گرمي جو زور ٽٽي ويو. ٽنڊي آدم ۽ ڀرپاسي وارن علائقن ۾ مٽيءَ جي طوفان سبب مواصلاتي نظام ڊانوانڊول ٿي ويو. نبي سر  روڊ ۽ ڀرپاسي جي علائقن ڀنڀو خان چانڊيو، شاليواهه، ڪيٽل فارم ۽ ٻين علائقن ۾ برسات سبب گرمي جي سٽيل ماڻهن جي منهن تي مرڪون موٽي آيون. مٽياري ۾ تيز هوا سان گڏ برسات سبب ڪيترن ئي ڪچن گهرن جون ڇتيون ۽ دڪانن جا ڇپرا اڏامي ويا. هالا، هالا پراڻا، ڀاڻوٺ، کنڊو، اجن شاهه، ڪرم خان نظاماڻي سميت مختلف علائقن ۾ ڪٿي هلڪي ته ڪٿي تيز برسات جو وسڪارو ٿيو، ان دوران بجلي بند ٿي وئي. نيوسعيد آباد شهر جي ريلوي پاڙي ۾ گهر جي ڀت ڪِرڻ سبب پورهيت ڪارو ملاح جو معصوم پٽ 13 ورهين جو حامد ملاح دٻجي فوت ٿي ويو. اڏيرو لال، طاهر هڱورو، نوبت مري، بائو خان پٺاڻ، ڏهدري موري ۽ ٻين علائقن ۾ برسات سبب گرمي جو زور ٽٽي ويو. ڄام نواز علي ۽ ڀرپاسي جي علائقن ۾ تيز برسات سبب هيٺانهين وارا علائقا پاڻي هيٺ اچي ويا، جڏهن ته بجلي جو نظام درهم برهم ٿي ويو. ڄام صاحب  ۽ ڀرپاسي جي علائقن ۾ تيز برسات سبب ڪچن گهرن جون ڇتيون اڏامي ويون، سولر پليٽون توڙي سائن بورڊ ڪري پيا، جڏهن ته مواصلاتي نظام ڊانواڊول ٿي ويو. چمبڙ  ۽ ڀرپاسي جي علائقن ۾ برسات سبب موسم وڻندڙ ٿي وئي ۽ گرمي جي سٽيل ماڻهن جا چهرا ٻهڪي پيا. بدين ۽ ڀرپاسي جي علائقن ڪڍڻ، سيراڻي، ٽنڊوباگو ۽ ٻين علائقن ۾ برسات سبب گرمي جو زور ٽٽي ويو، موسم خوشگوار ٿي وئي. سجاول، چوهڙ جمالي ۽ ڀرپاسي جي علائقن ۾ به برسات سبب موسم وڻندڙ ٿي وئي ۽ گرمي جي سٽيل ماڻهن جي منهن تي مرڪون موٽي آيون…..