ايوان زراعت سنڌ جي مرڪزي صدر سيد ميران محمد شاھه سکر بئراج جي غير معمولي صورتحال بابت سنڌ جي آبپاشي کاتي جي سيڪريٽري ظريف کيڙي کي خط لکي سخت ڳڻتيءَ ۽ خدشن جو اظھار ڪيو آھي. ايوان زراعت سنڌ جي مرڪزي صدر سيد ميران محمد شاھه تنظيم جي ھيڊڪوارٽر حيدرآباد مان پنھنجي جاري ڪيل پريس بيان ۾ چيو ته سکر بئراج سنڌ جي ڪروڙين ماڻھن جو جيئاپو ۽ سنڌ جي زرعي وجود توڙي بقا جي ساهه واري رڳ آھي. سندس چوڻ هو ته آبپاشي کاتي جي لاپرواھه، نااهل ۽ ڪرپٽ ڪامورن تاريخي ۽ اھم سکر بئراج کي ننڌڻڪو سمجھي ھٿ چراند ڪرڻ واري عمل کي هو سنڌ جي وجود ۽ مقدر سان ھٿ چراند ڪرڻ برابر سمجھن ٿا. ايوان زراعت سنڌ جي مرڪزي صدر، سيڪريٽري آبپاشي کي لکيل کليل خط ۾ وڌيڪ چيو ته ايوان زراعت سنڌ کي سکر بئراج جو 47 ھون اھم دروازو لڙھي وڃڻ ۽ 44 ھين در کي جزوي نقصان پھچن تي سخت ڳڻتي ۽ خدشو آھي ته اھم بئراج جو اھم در ڪيئن لڙھي ويو، جنھن سان سنڌ جي زراعت تي انتھائي ناڪاري اثر پوڻ جو خدشو پيدا ٿي ويو آھي. ميران محمد شاهه، آبپاشي کاتي جي سيڪريٽري ظريف کيڙو سان مخاطب ٿيندي چيو ته ايوان زراعت سنڌ جي آبادگارن جي سڀ کان وڏي تنظيم آھي، جيڪا سمجھي ٿي ته سکر بئراج جو 47 ھون دروازو لڙھي وڃڻ انتھائي غير معمولي واقعو آھي. هن چيو ته هو انڪوائري لاءِ سيڪريٽري زراعت پاران جوڙيل جاچ ڪميٽي کي رد ڪن ٿا، آبادگارن کان واقعي بابت شيون لڪايون نه وڃن ۽ نه ئي اوندھه ۾ رکيو وڃي. ايوان زراعت سنڌ جي مرڪزي صدر، سيڪريٽري آبپاشي تي زور ڀريندي چيو ته فوري طور تي سنڌ جي سمورن اسٽيڪ ھولڊرز، سنڌ جي رٽائرڊ ۽ حاضر سروس پاڻي ماھرن، آبپاشي کاتي جي عملدارن ۽ سمورين رجسٽرڊ آبادگار تنظيمن جو اجلاس سڏائي سکر بئراج بابت تفصيلي بريفنگ ڏني وڃي. ھن افسوس جو اظھار ڪندي چيو ته سکر بئراج جو ايڏو وڏو واقعو ٿيڻ باوجود اڃا تائين سيڪريٽري آبپاشي سنڌ جي ڪنھن به اسٽيڪ ھولڊر کي گھرائي بئراج بابت نه تفصيلي بريفنگ ڏني آھي ۽ نه ئي آبادگارن کي اعتماد ۾ ورتو ويو آھي. ميران محمد شاهه، سيڪريٽري آبپاشي کي چيو ته ھو فوري طور پاڻي ماھرن ۽ آبادگار تنظيمن جو اجلاس سڏائي، ٻڌايو وڃي ته سکر بئراج جو 47 ھون دروازو ڪيئن لڙھي ويو ۽ 44 ھين دروازي کي نقصان ڪيئن پھتو، سبب ڪھڙا آھن. ايوان زراعت سنڌ جي صدر چيو ته آبڪلاڻي جي مند ۾ بئراج جو مرمتي ڪم ٿيو يا نه ٿيو، بئراج جو دروازو لڙھڻ جي غير معمولي واقعي ۾ ڪھڙا نااھل عملدار ۽ عملو ملوث آھي سندن پتو لڳائي سخت سزائون ڏنيون وڃن. محمد ميران شاهه چيو ته ايوان زراعت سنڌ، سکر بئراج جو 47 ھون در لڙھي وڃڻ ۽ 44 ھين در کي جزوي نقصان پھچڻ کي آبادگارن جا ارمان لڙھي وڃڻ ۽ نقصان پھچڻ برابر سمجھي ٿي، ڇو ته ھن وقت سارين جا بيڄارا، لکين ايڪڙن تي ووئڻن ۽ ڪمند جا تيار ٿيل فصل بيٺل آھن. سندس چوڻ هو ته فصلن کي ھن وقت پاڻي جي سخت ضرورت آھي، جيڪڏھن پاڻي نه مليو ته سنڌ جي زراعت ۽ تيار فصلن کي ازالو نه ٿيڻ جوڳو نقصان پھچندو، جنھن سان سنڌ جا آبادگار، ھاري ۽ پورھيت طبقو معاشي طور تي انتھائي سنگين حالتن کي منھن ڏيڻ تي مجبور ٿي ويندو. ايوان زراعت سنڌ، صوبائي سرڪار کان مطالبو ڪيو ته سکر بئراج جو 47 ھون در لڙھڻ واري غير معمولي واقعي ۽ گيٽ نمبر 44 ھين کي جزوي نقصان پھچڻ جي اعليٰ سطحي انڪوائري ڪرائي، لاپرواھي ۾ ملوث آبپاشي کاتي جي سمورن عملدارن ۽ عملي جو پتو لڳائي سخت قانوني ڪارروائي عمل ۾ آندي وڃي، بئراج جي 47 ھين در تي ڪاپر جو بند ٻڌي فوري طور تي سنڌ جو پاڻي بحال ڪيو وڃي.

ميرپورماٿيلي جي شھيد صحافي نصرالله گڏاڻي جي قتل ڪيس جي دھشتگردي ٽوڙ عدالت  ۽ سيڪنڊ سول جج جي عدالت ۾ ڌار ڌار ٻڌڻي ٿي. پوليس گرفتار جوابدار اصغر لنڊ کي دهشتگردي ٽوڙ عدالت ۾  پيش ڪري رمانڊ جي درخواست ڪئي. عدالت جوابدار کي 26 جون تائين رمانڊ تي پوليس حوالي ڪري ڇڏيو. سيڪنڊ سول جج جي موڪل تي هجڻ ڪري فريادي ۽ شاهدن جو 164 وارو بيان رڪارڊ نه ٿي سگهيو جنهن سبب ٻڌڻي سڀاڻي تائين ملتوي ڪئي وئي. ان موقعي تي شھيد صحافي نصرالله گڏاڻي ڪيس جي وڪيل ميڊيا سان ڳالھائيندي چيو ته عدالت رمانڊ لاءِ آڊر پاس ناهن ڪيا، سندن آرگيومينٽس ٻڌا ويا آھن، عدالت کي اپيل ڪئي آھي ته رمانڊ ۾ واڌ ڪئي وڃي ڇاڪاڻ ته ڪيس ۾ جي آءِ ٽي جوڙي وئي آھي ۽ ٻيا جوابدار گرفتار ڪرڻا آھن. ھن چيو ته شهيد صحافي جي امڙ پٺاڻي، سندس ڀاءُ يعقوب ۽ صلاح الدين جو 164 جو بيان رڪارڊ ڪرڻ لاءِ لڳل آھي پر جج موڪل تي آھي جنهن لاءِ سڀاڻي جي تاريخ ڏني وئي آھي. سندس چوڻ هو ته مخالف ڌر جي وڪيل عدالت کي درخواست ڏني ته کين ھڪ ھفتي جي تاريخ وڌائي ڏني وڃي پر عدالت سڀاڻي صبح جي تاريخ ڏني آهي. شھيد صحافي نصرالله گڏاڻي ڪيس جي وڪيل چيو ته سڀاڻي 164 جو بيان ضرور رڪارڊ ٿي ويندو، پوليس مان اميد آھي ته فيئر انويسٽيگيشن ٿيندي ۽ جيڪي جوابدار آھن اھي عدالت ۾ پيش ڪندا.

سکر بئراج جي گيٽ نمبر 47 تي بند ٻڌڻ لاءِ ڪم جاري آهي جڏهن ته سکر بئراج وٽ پاڻي  وهڪرن ۾ 24 ڪلاڪن اندر 17 هزار 855 ڪيوسڪ جي واڌ رڪارڊ ڪئي وئي. پاڻي وهرڪن ۾ واڌ سبب گيٽ جي تبديلي واري ڪم ۾ ڏکيائيون اچڻ شروع ٿي ويون آهن. پاڻي وهڪرن ۾ واڌ کانپوءِ سکر بئراج جي مختلف واهن ۾ پاڻي ڇوڙ ڪرڻ  شروع ڪيو ويو آهي. سکر بئراج جي واهن ۾ 26 هزار 355 ڪيوسڪ پاڻي ڇوڙ ڪيو پيو وڃي. سکر بئراج مان نڪرنڙ نارا ڪئنال ۾ 11 هزار 955 ڪيوسڪ ۽  روهڙي ڪئنال ۾ 7 هزار ڪيوسڪ پاڻي ڇوڙ ڪيو پيو وڃي. رائيس ڪئنال ۾ 5 هزار 50 ڪيوسڪ، دادو ڪئنال ۾ 400، خيرپور ايسٽ ۾ 750 ۽ خيرپور ويسٽ ۾ 600  ڪيوسڪ پاڻي ڇوڙ ڪيو پيو وڃي. ڪابل ندي ۾ پاڻي جي واڌ کانپوءِ هيٺاهين درجي جي ٻوڏ ڊڪليئر ٿي وئي آهي. آبپاشي ذريعن جو چوڻ آهي ته پاڻي وهڪرن ۾ واڌ کانپوءِ اهو پاڻي سکر بئراج طرف وڌي رهيو آهي جڏهن ته بئراج جو ڪم جلد مڪمل نه ڪيو ويو ته اڳتي ڪم ڏکيو ٿي سگهي ٿو.

ڪراچي جي علائقي ڪورنگي ۾ ايڪسائيز نارڪوٽيڪس ٽيم ڪارروائي ڪندي  هڪ منشيات وڪرو ڪندڙ کي گرفتار ڪري سندس قبضي مان منشيات هٿ ڪري ورتي آهي. ايڪسائيز اختيارين جو چوڻ آهي ته گرفتار جوابدار جي نشاندهي تي ڪورنگي ۾  ڇاپو هڻي جوابدار مراد خان کي  گرفتار ڪري سندس قبضي مان  23 سئو گرام چرس هٿ ڪيو ويو آهي. ايڪسائيز اختيارين جو چوڻ آهي ته گرفتار جوابدار جي ساٿين جي گرفتاري لاءِ ڇاپن جو سلسلو جاري آهي………..

ميرپو ماٿيلي ويجهو  پوليس پاران مبينا مقابلي ۾ هڪ ڏوهاري کي زخمي حالت ۾ گرفتار ڪرڻ جي دعويٰ ڪئي وئي آهي. پوليس جو چوڻ آهي ته داد لغاري لنڪ روڊ تي گشت دوران ڏوهارين سان مقابلو ٿي پيو، فائرنگ جي ڏي وٺ ۾ هڪ ڏوهاري کي زخمي حالت ۾ گرفتار ڪيل ويو آهي جڏهن ته سندس 6 ساٿي فرار ٿيڻ ۾ ڪامياب ٿي ويا آهن. پوليس موجب زخمي حالت ۾ گرفتار ڪيل جوابدار جي سڃاڻپ مهيوال عرف آغا بوزدار جي نالي سان ٿي آهي، سندس قبضي مان هڪ پسٽل ۽ گوليون به هٿ ڪيون ويون آهن. پوليس موجب فرار ٿي ويل جوابدارن جي به سڃاڻپ ٿي وئي آهي جن کي به جلد گرفتار ڪيو ويندو. پوليس جو چوڻ آهي ته زخمي حالت ۾ گرفتار ڪيل جوابدار چوري، ڦر وارداتن ۽ پوليس مقابلن سميت ٻين ڪيترن ئي ڪيسن ۾ گهربل آهي…….

خانواهڻ ويجهو پيرن جي حويلي ۾ مبينا طور زيادتي جو نشانو بڻائي قتل ڪيل معصوم نينگري فاطمه ڦرڙو ڪيس جي شاهد نينگري اجالا کي مبينا طور اغوا ڪرڻ جي ڪوشش ڪئي وئي آهي. نينگري ۽ سندس والده جي رڙين تي ڳوٺاڻن پهچي کيس اغوا ٿيڻ کان بچائي ورتو. مقتول نينگري فاطمه ڦرڙو جي والد نديم ڦرڙو جو چوڻ آهي ته بااثر پيرل شاهه نينگري اجالا کي اغوا ڪرائڻ جي ڪوشش ڪئي ته جيئن اهي ڪيس جي شاهدي تبديل ڪرائي سگهن. سندس چوڻ هو ته  خانواهڻ پوليس بااثر خلاف  ڪابه ڪارروائي ڪرڻ لاءِ تيار نه آهي معاملي جو نوٽيس وٺي جوابدارن خلاف ايڪشن کنيو وڃي.