وزيراعظم شهباز شريف قومي ايڪشن پلان جي اپيڪس ڪميٽي جو اجلاس اڄ طلب ڪري ورتو. نيشنل ايڪشن پلان ايپڪس ڪميٽي جو اجلاس اڄ منجهند هڪ وڳي وزيراعظم هائوس ۾ ٿيندو. اجلاس ۾ آرمي چيف جنرل عاصم منير سميت وفاقي وزير، چئني صوبن جا وڏا وزير، گورنر، چيف سڪيريٽريز ۽ آءِ جيز شرڪت ڪندا. ذريعن موجب اجلاس ۾ چيني ورڪرن جي سيڪيورٽي بابت تفصيلي بريفنگ ڏني ويندي جڏهن ته قومي سلامتي بابت اهم فيصلن جو امڪان آهي. ذريعن جو چوڻ آهي ته سعودي عرب ۽ چين جي سيڙپڪارن سان ملاقاتن بابت به ايپڪس ڪميٽي کي بريفنگ ڏني ويندي.

ڪرم ضلعي ۾ بارودي سرنگهه جي ڌماڪي سبب پاڪ فوج جا 5 جوان شهيد ٿي ويا. آءِ ايس پي آر طرفان جاري ڪيل بيان ۾ چيو ويو ته 21 جون تي ڪرم ضلعي جي علائقي صده ۾ سڪيورٽي فورسز جي گاڏيءَ تي بارودي سرنگهه جو ڌماڪو ٿيو، جنهن سبب پنج فوجي شهيد ٿي ويا. شهادت ماڻيندڙن ۾ حوالدار عقيل احمد، لانس نائڪ محمد  سفير، سپاهي انوش رفون، سپاهي محمد اعظم خان ۽ سپاهي هارون وليم شامل آهن. آءِ ايس پي آر موجب شهيدن وطن خاطر لازوال قرباني ڏيندي شهادت ماڻي،  علائقي ۾ موجود دهشتگرد کي ختم ڪرڻ لاءِ ڪليئرنس آپريشن پڻ ڪيو ويو. پاڪ فوج جي ترجمان چيو ته حملي ۾ ملوث ڪردارن کي انصاف جي ڪٽهير ۾ آندو ويندو، سڪيورٽي فورسز دهشتگردي لعنت کي ختم ڪرڻ لاءِ پرعزم آهي.

بجلي جي بنيادي ٽيرف ۾ اضافي واري معاملي تي نيپرا واهپيدارن لاءِ فڪسڊ چارجز لاڳو ڪرڻ جو فيصلو ڪري ڇڏيو. فڪس چارجز واهپيدارن جي بنيادي ٽيرف ۾ شامل ڪيو ويو آهي، بجلي جي بنيادي ٽيرف ۾ 5 رپيا 72 پيسا في يونٽ اضاف ڪيو ويو آهي، گهريلو واهپيدارن تي هر مهيني 200 کان هزار رپيه فڪس چارجز لاڳو ڪيو ويو آهي. نيپرا طرفان بجلي جي نئون ٽيرف متعارف ڪرايو ويو آهي جيڪو پهرين جولاءِ کان لاڳو ٿيندو، گهريلو واهپيدارن لاءِ مهيني جي يونٽس جي کپت جي لحاظ سان 200 کان هڪ هزار رپيا چارجز مقرر ڪيو ويو آهي. ڪمرشل واهپيدارن تي مقرر چارجز ۾ 300 سيڪڙو ۽ صنعتي استعمال تي 355 سيڪڙو تائين اضافو ڪيو ويو آهي، جڏهن ته ڊسڪوز کي مقرر چارجز ذريعي پنهنجي آمدني وڌائڻ ۾ مدد ملندي. 301 کان 400 يونٽ استعمال ڪندڙ گهريلو واهپيدار پهرين جولاءِ کان 200 رپيا چارجر ادا ڪندا جڏهن ته 401 کان 500 يونٽ استعمال ڪندڙ 400 رپيا ادا ڪندا. 501 کان 600 يونٽ بجلي استعمال ڪندڙ واهپيدارن کي 600 رپيا هر مهيني ادا ڪرڻا پوندا، جڏهن ته 601 کان 700 يونٽ استعمال ڪندڙ گهريلو صارفين کي 800 رپيا ادا ڪرڻا پوندا. اهڙي طرح 700 يونٽن کان وڌيڪ استعمال ڪندڙ گهريلو واهپيدار هڪ هزار رپيا چارجز ادا ڪندا ۽ ميٽر آف ٽائيم استعمال ڪندڙ گهريلو صارفين به هڪ هزار رپيا هر مهيني فڪس چارجز ادا ڪندا. پنج ڪلو واٽ کان گهٽ لوڊ وارا ڪمرشل واهپيدار هڪ هزار رپيا چارجز ادا ڪندا ۽ 5 ڪلوواٽ يا ان کان وڌيڪ لوڊ وارا ڪمرشل صارفين 2000 رپيا ادا ڪندا. ٽي او يو ميٽرنگ تحت 25 ڪلو واٽ تائين استعمال ڪندڙ صنعتي صارفين 1000 رپيا ادا ڪندا، جڏهن ته بي ٽو ڪيٽيگري وارا صارفين 500 ڪلو واٽ تائين بجلي استعمال ڪن ٿا 2000 رپيا ادا ڪندا. 5 هزار ڪلو واٽ استعمال ڪندڙ  بي ٿري ڪيٽيگري جا صنعتي واهپيدار 2000 رپيا مقرر چارجز ادا ڪندا ۽ بي فور ڪيٽيگري وارا صارفين به مقرر 2000 رپيا هر مهيني فڪسڊ چارجز ادا ڪندا.

پاڪستان اسٽاڪ ايڪسچينج تيزيءَ جي نئين تاريخ لکي ڇڏي، هنڊريڊ انڊيڪس 80 هزار جي حد به پار ڪري ويو، حڪومت جي پاليسين سبب سيڙپڪارن جو اعتماد بحال ٿيو آهي. پاڪستان اسٽاڪ مارڪيٽ ۾ رڪارڊ تيزي جو سلسلو برقرار آهي. ڪاروباري هفتي جي آخري ڏينهن پاڪستان اسٽاڪ ايڪسچينج ۾ زبردست تيزي ڏسي ۾ آئي. 12 سئو پوائنٽس جي اضافي سان هنڊريڊ انڊيڪس 80 هزار 2 پوائنٽس جي سطح تي پهچي ويو. انٽر بينڪ ۾ آمريڪي ڪرنسي جي قيمت مستحڪم آهي جنهن سان انٽر بينڪ ۾ ڊالر 278 رپيا 60 پيسا تي برقرار آهي.

سنڌ سرڪار ڪچي ۾ ڌاڙيلن خلاف آپريشن، سيف سٽي پراجيڪٽ تي ڪم تيز ڪرڻ ۽ سي ٽي ڊي کي وڌيڪ سهولتون ڏيڻ جو فيصلو ڪيو آهي، وڏي وزير مراد علي شاهه جو چوڻ آهي ته هو سيف سٽي پراجيڪٽ لاءِ ڪم تيز ڪرڻ چاهين ٿا، آءِ جي سنڌ سيف سٽي منصوبي لاءِ ضروري سهولتون فراهم ڪري، سنڌ ۽ پنجاب ۾ ڌاڙيلن خلاف ٽرائي بارڊر مئنيجمينٽ سسٽم ٺاهن. سنڌ جي وڏي وزير مراد علي شاهه جي صدارت هيٺ اجلاس ٿيو. سينيئر صوبائي وزير شرجيل ميمڻ، گهرو وزير ضياءَ الحسن لنجار، چيف سيڪريٽري، آءِ جي سنڌ ۽ ٻين جي شرڪت ڪئي. اجلاس ۾ سيف سٽي پراجيڪٽ، ڪچي جي علائقن ۾ ڌاڙيلن خلاف آپريشن، سي ٽي ڊي کي وڌيڪ سهولتون ڏيڻ بابت غور ۽ فيصلا ڪيا ويا. وڏي وزير مراد علي شاهه چيو ته ايس فور منصوبي جو گذريل ڏينهن افتتاح ڪيو آهي، هاڻي کيس سيف سٽي تي ڪم ٿيندي نظر اچڻ گهرجي، سيف سٽي لاءِ هلندڙ مهيني جي آخر ۾ سي سي ٽي وي ڪيمرائن جي شمپنٽ اچي ويندي، فائبر آپٽڪ ڪيبل وڇائڻ لاءِ رائيٽ آف وي جي اين او سي ورتي پئي وڃي. وڏي وزير کي آگاهي ڏني وئي ته ايمرجنسي ريسپونس وهيڪل هري پور کان هن هفتي اچڻ شروع ٿي ويندا. وڏي وزير مراد علي شاهه چيو ته هو سيف سٽي تي ڪم تيز ڪرڻ چائن ٿا، آءِ جي سنڌ، سيف سٽي منصوبي لاءِ ضروري سهولتون فراهم ڪري. وڏي وزير کي آگاهي ڏني وئي ته شهر ۾ اسٽريٽ ڪرائيم کي ڪنٽرول ڪرڻ لاءِ پوليس پيٽرولنگ وڌائي وئي آهي. وڏي وزير مراد علي شاهه چيو ته ڪراچي جي جنهن علائقي ۾ اسٽريٽ ڪرائيم وڌيڪ هجي اتي پوليس آفيسرن کي جوابده ڪريو. صوبائي گهرو وزير ضياءُ الحسن لنجار چيو ته پوليس ٿاڻن جا دورا شروع ڪيا آهنم اسٽريٽ ڪرائيم کي ڪنٽرول ڪري رهيا آهن. آءِ جي سنڌ، وڏي وزير کي بريفنگ ڏيندي چيو ته ڪچي جي علائقن ۾ ڌاڙيلن خلاف آپريشن جاري آهي، آپريشن ۾ پوليس ۽ رينجرز جون گڏيل ڪارروايون جاري آهن، 14 ڊرون ڪيمرا، سکر، گهوٽڪي، ڪشمور ۽ شڪارپور کي ڏنيون آهن، ڪيمرائن سان ڪچي ۾ ڌاڙيلن جي ٿاڪن تي نظر رکي ويندي. صوبائي گهرو وزير ضياءُ الحسن لنجار چيو ته وڌيڪ 20 ڊرون ڪيمرائن جي ضرورت آهي. وڏي وزير مراد علي شاهه، آءِ جي سنڌ کي هدايت ڪندي چيو ته ڪچي جي پوليس اهلڪارن کي جديد هٿيار هلائڻ جي سکيا ڏني وڃي. آءِ جي سنڌ غلام نبي ميمڻ چيو ته سکر ۽ لاڙڪاڻي ڊويزن جي پوليس اهلڪارن کي سکيا ڏني آهي، وڌيڪ سکيا ڏئي رهيا آهن. وڏي وزير مراد علي شاهه جو چوڻ آهي ته سنڌ ۽ پنجاب ۾ ڪرائيم ڪندڙ ڌاڙيلن خلاف ٽرائي بارڊر مئنيجمينٽ سسٽم ٺاهن. آءِ جي سنڌ چيو ته ٽرائي بارڊر بابت اجلاس فيبروري 2024ع کان جاري آهي، ٽرائي بارڊر ميٽنگز ۾ بهاولپور، رحيم يار خان ۽ راجن پور جي سينيئر پوليس آفيسرن سان رابطا ڪري رهيا آهن. سنڌ جي وڏي وزير ڪائونٽر ٽيررازم پوليس کي چار ريجنل ڪمپليڪس بڻائڻ جو ڪرڻ تيز ڪرڻ جي هدايت ڪري ڇڏي. وڏي وزير مراد علي شاهه چيو ته سي ٽي ڊي جا چار ريجنل ڪمپليڪس حيدرآباد، ميرپورخاص، سکر ۽ لاڙڪاڻي ۾ قائم ڪيا پيا وڃن. سنڌ سرڪار سي ٽي ڊي ريجنل ڪمپليڪس لاءِ 2 ڏهائي 8 ارب رپين جي منظوري ڏئي ڇڏي. وڏي وزير مراد علي شاهه چيو ته سافٽ ويئر ۽ فارنزڪ ٽولز لاءِ 400 ملين رپيا پوليس ڏنا آهن. آءِ جي سنڌ غلام نبي ميمڻ آگاهي ڏيندي چيو ته سافٽ ويئر ۽ فارنزڪ ٽولز انسٽال ٿي چڪا آهن. وڏي وزير مراد علي شاهه سافٽ ويئر کي فوري طور فعال ڪرڻ جي هدايت ڪري ڇڏي. صوبائي گهرو وزير ضياءَ الحسن لنجار جو چوڻ آهي ته دهشتگردي جي ڪيسن جي پراسيڪيوشن بهتر ٿي آهي، 2023ع جي ستن ڪيسن ۽ 2024ع جي 11 ڪيسن ۾ سزائون ٿيون آهن.