سپريم ڪورٽ اليڪشن  ٽربيونلز جي جوڙجڪ بابت فيصلو معطل ڪرڻ بابت اليڪشن ڪميشن جي درخواست رد ڪندي لارجر بينچ جوڙڻ لاءِ معاملو ٽه رڪني ڪميٽي کي اماڻي ڇڏيو. سپريم ڪورٽ جي چيف جسٽس قاضي فائز عيسيٰ ۽ جسٽس نعيم اختر افغان تي ٻڌل ٻه رڪني بينچ اليڪشن ٽربيونلز جي جوڙجڪ خلاف اليڪشن ڪميشن جي درخواست جي ٻڌڻي ڪئي. ٻڌڻي دوران اليڪشن ڪميشن جو وڪيل سڪندر بشير، تحريڪ انصاف جو وڪيل سلمان اڪرم راجا عدالت ۾ پيش ٿيا. چيف جسٽس قاضي فائز عيسيٰ رمارڪس ڏيندي چيو ته سمجهه ۾ نٿو اچي اليڪشن ڪميشن لاهور هائيڪورٽ جي چيف جسٽس سان ڳالهيون ڇو نه ڪيون، آئين ۾ ڪٿي به ناهي لکيل ته ڪنهن جج سان ملاقات نٿي ڪري سگهجي، ملاقات ڪرڻ ۾ انا جي ڪهڙي ڳالهه آهي؟، ٻئي آئيني ادارا آهن. چيف جسٽس قاضي فائز عيسيٰ اليڪشن ڪميشن جي وڪيل سان مخاطب ٿيندي چيو ته اليڪشن ڪميشن ئي تڪراري ڇو هوندي آهي؟، اوهان ماڻهو اليڪشن ڪرائڻ ۾ ناڪام رهيا، ايوان صدر ۾ وڃڻ تي اتفاق ٿيو ته اليڪشن ڪميشن بلڪل سامهون آهي، اليڪشن ڪميشن ڪيئن صدارتي آرڊيننس ٺاهي رهي آهي؟، هي ته پارليامينٽ جي توهين هوندي. چيف جسٽس قاضي فائز عيسيٰ اليڪشن ڪميشن جي وڪيل کي مخاطب ٿيندي چيو ته اوهان چئي رهيا آهيو اليڪشن ڪرائڻ سندن ذميواري آهي، هائيڪورٽ پري آهي، اوهان ڪيئن چئي رهيا آهيو ته صدارتي آرڊيننس آڻي سگهو ٿا؟، ڇا هي قانون آهي؟. اليڪشن ڪميشن جي وڪيل سڪندر بشير چيو ته هن قانون ناهي ٺاهيو، هو جنرل ڳالهه کان وڌيڪ نٿو ڪري سگهي، آرڊيننس جو دفاع نه ڪري رهيو آهي. چيف جسٽس قاضي فائز عيسيٰ چيو ته سپريم ڪورٽ ۾ ڪيسن جي ذميواري سندس آهي، پنهنجي ڪمزوري کي سبب نه بڻايو. چيف جسٽس قاضي فائز عيسيٰ پي ٽي آءِ وڪيل کان پڇاڻو ڪيو ته ڇا آرڊيننس کي چئلينج ناهي ڪيو؟، جنهن تي پي ٽي آءِ وڪيل سلمان اڪرم راجا چيو ته آرڊيننس کي لاهور ۽ اسلام آباد هائيڪورٽس ۾ چئلينج ڪيو آهي. چيف جسٽس قاضي فائز عيسيٰ پڇاڻو ڪيو ته مختلف هائيڪورٽس ڇو؟، آرڊيننس ته سڄي ملڪ ۾ لاڳو ٿيندو، اليڪشن ٽربيونل لاءِ آئين ڇا ٿو چئي؟، پارليامينٽ قانون ٺاهيندي آهي، هو قانون جي حفاظٽ ڪندا آهن، جنهن جو ڪم آهي کيس ڪرڻ ڏنو وڃي، هڪ گڏجاڻي ۾ ويهي سڀ ڪجهه طئي ڪري سگهجي ٿو. چيف جسٽس قاضي فائز عيسيٰ چيو ته آرڊيننس سپريم ڪورٽ ۾ چئلينج ناهي ٿيو، ان لاءِ ان تي نوٽيس نٿو ڪري سگهجي، جڏهن ڪجهه پسند ناهي ايندو ته قانون تبديل ڪيو ويندو آهي، جڏهن پارليامينٽ قانون ٺاهي ٿي ته آرڊيننس پارليامينٽ جي توهين آهي. وڪيل سڪندر بشير چيو ته آرڊيننس قانوني آهي ڇو ته آئين اجازت ڏئي ٿو، جنهن تي جسٽس قاضي فائز عيسيٰ چيو ته آرڊيننس جاري ڪرڻ جا سبب ٻڌائيندا، جيڪڏهن پارليامينٽ قانون تبديل ڪيو هو ته ان کي آرڊيننس ذريعي واپس آندو ويو، آرڊيننس آڻڻ جي ڪهڙي ايمرجنسي هئي؟. اليڪشن ڪميشن جي وڪيل چيو ته عدليه تي وڌيڪ بار ٿيڻ سبب آرڊيننس آندو ويو، جنهن تي چيف جسٽس پڇاڻو ڪيو ته خالي سيٽون ڀرڻ ڪنهن جو ڪم آهي؟. وڪيل سڪندر بشير چيو ته لاهور هائيڪورٽ جي ججن جو انگ 60 آهي جڏهن ته 40 ڪم ڪري رهيا آهن، چيف جسٽس قاضي فائز عيسيٰ پڇاڻو ڪيو ته ٽربيونل جي ججن جي مقرري ڪنهن جو اختيار آهي؟، سندس معاملو سامهون آهي ته ججن جي مقرري ڪير ڪري سگهي ٿو؟، آئين ڇا ٿو چئي؟. چيف جسٽس قاضي فائز عيسيٰ چيو ته سٺي قانون جي تشريح جي ضرورت ناهي، اليڪشن ڪميشن آئيني ادارو آهي ۽ چونڊون ڪرائڻ اليڪشن ڪميشن جي ذميواري آهي، آئين موجب ٽربيونل ٺاهڻ اليڪشن ڪميشن جو ڪم آهي. چيف جسٽس، اليڪشن ڪميشن جي وڪيل کان پڇاڻو ڪيو ته ڇا لاهور هائيڪورٽ جو فيصلو قانون موجب آهي؟ جنهن تي وڪيل سڪندر بشير چيو ته فيصلو قانون موجب آهي پر هو ٻڌائڻ ٿو چاهي ته هاءِ ڪورٽ ڇا ڪيو. سپريم ڪورٽ اليڪشن ٽربيونل جوڙڻ جو فيصلو معطل ڪرڻ بابت اليڪشن ڪميشن جي درخواست رد ڪندي معاملو لارجر بينچ جوڙڻ لاءِ 3 رڪني ڪميٽي ڏانهن موڪلي ڇڏيو………..

سينيٽ جي ناڻي بابت اسٽيڊنگ ڪميٽي، اليڪٽرڪ ۽ هائبرڊ گاڏين تي ٽيڪس جي شرح وڌائڻ جي مخالفت ڪري ڇڏي، سينيٽر فيصل واوڊا جو چوڻ آهي ته سموري دنيا ۾ اليڪٽرڪ گاڏين کي هٿي ڏني پئي وڃي. سينيٽر سليم مانڊوي والا جي صدارت هيٺ سينيٽ جي ناڻي بابت اسٽيڊنگ ڪميٽي جو اجلاس ٿيو. انڊسٽري نمائندي چيو ته جوسز تي ايف اي ڊي 20 سيڪڙو آهي ۽ 18 سيڪڙو جي ايس ٽي آهي، ٽيڪس سبب سندن وڪري ۾ گهٽتائي ٿي آهي. ايف بي آر چيئرمين چيو ته هي ٽيڪس گذريل سال فنانس بل ۾ لڳائي وئي هئي، نئين مالي سال جي فنانس بل ۾ هي ٽيڪس ناهي لڳائي وئي. سينيٽر فاروق ايڇ نائڪ چيو ته جيڪڏهن هي نئين مالي سال ۾ فنانس بل ۾ ناهي ته هن تي ڳالهائڻ اجايو آهي، هو آئيني طور تي هن بابت ڳالهائي نٿا سگهن. ڪميٽي جي چيئرمين چيو ته بجيٽ بعد انڊسٽري جا نمائيندا اچن ۽ بريفنگ ڏين. سينيٽ جي ناڻي بابت اسٽيڊنگ ڪميٽي، اليڪٽرڪ ۽ هائبرڊ گاڏين تي ٽيڪس جي شرح وڌائڻ جي مخالفت ڪري ڇڏي. سينيٽر فيصل واوڊا چيو ته سموري دنيا ۾ اليڪٽرڪ گاڏين کي هٿي ڏني پئي وڃي، ڇهن مهينن ۾ جيڪڏهن ڪنهن جي شپمينٽ پهتي آهي ته کيس خبر ئي ناهي، پاليسي ٺاهي جڏهن هن تي نظرثاني ڪئي وڃي ته مسئلن ۾ اضافو ٿيندو آهي. ايف بي آر چيئرمين چيو ته ڏيڍ ڪروڙ رپين کان مٿي جي گاڏي تي 25 سيڪڙو لڳائي وئي آهي. سينيٽر فيصل واوڊا چيو ته ٽيڪس ۽ پاليسين ۾ تبديلي سبب ڪوبه هن ملڪ ۾ انڊسٽري نٿو لڳائي. ايف بي آر اختيارين چيو ته ٻاهران گهرايل گاڏين تي ٽيڪس لڳائي آهي، مقامي طور تي تيار ٿيل گاڏين تي ٽيڪس ناهي لڳائي. سينيٽر فيصل واوڊا چيو ته هي سندس ڪاروبار آهي، کيس خبر آهي ته ڪير گاڏين تي ٽيڪس لڳرائي رهيو آهي، مجبور نه ڪيو ته هو عوام کي ٻڌائيندو. ڪميٽي معاملي کي ملتوي ڪري ڇڏيو…..

سنڌ جي وڏي وزير مراد علي شاهه چيو آهي ته گذريل سال گهوٽڪي ۾ پنج جوان شهيد ڪيا ويا هئا، اربع ڏينهن اهلڪارن جا قاتل مقابلي ۾ ماريا ويا آهن، سڄي سنڌ ۾ ڏوهن تي ضابطو آندو ويندو، شهرين جي حفاظت حڪومت جي ذميواري آهي، ماضي ۾ ڪراچي ۾ ڪيترائي دهشتگردي جا واقعا ٿيا هئا، امن امان کي برقرار رکڻ پيپلزپارٽي جي پهرين ترجيح آهي، سنڌ جي 40 ٽول پلازه تي نگراني جو جديد نظام لڳايو ويو آهي، ڏوهن کي روڪڻ لاءِ جديد نظام اهم ڪردار ادا ڪندو، 400 جديد ڪيمرائن جي مدد سان روڊن جي نگراني ڪئي ويندي، منصوبي جو نالو سنڌ سمارٽ سرويلنس رکيو ويو آهي. سنڌ جي وڏي وزير مراد علي شاهه سمارٽ سرويلنس منصوبي جو افتتاح ڪري ڇڏيو. افتتاحي تقريب کي خطاب ڪندي وڏي وزير مراد علي شاهه چيو ته هن تقريب ۾ خاص مهمان طور شرڪت ڪرڻ سندس لاءِ فخر جي ڳالهه آهي، امن امان جو قيام پيپلز پارٽي جي پهرين ترجيح آهي، ٽيڪنالاجي جو وڌ کان وڌ استعمال سندن قائد بلاول ڀٽو زرداري جو ويزن آهي. سندس چوڻ هو ته سنڌ حڪومت ايس فور لاءِ لڳ ڀڳ هڪ ڏهائي پنج بلين رپيا مختص ڪيا آهن، سنڌ سمارٽ سرويلنس سسٽم ايس فور جديد ۽ ماڊرن ٽيڪنيڪس جو هڪ مجموعو آهي. وڏي وزير مراد علي شاهه چيو ته سنڌ جي سمورن 40 ٽول پلازه تي لڳل ڪيمرائون چهري جي سڃاڻپ ۽ آٽو ميٽڊ نمبر پليٽ چيڪ ڪرڻ جي صلاحيت رکن ٿيون. هن چيو ته هن سسٽم ۾ ڪيمرائن جي لائيو فيڊ جو هڪ سينٽرل ڪمانڊ اينڊ ڪنٽرول روم ۾ موجود سرور ذريعي جائزو ورتو ويندو، جيڪي چوري ٿيل گاڏين ۽ ڪرمنل رڪارڊ رکندڙ ماڻهن جي ڊيٽا جي فوري طور سڃاڻپ ڪندي. سنڌ جي وڏي وزير چيو ته ٽيڪنالاجي جو وڌ کان وڌ استعمال وقت جي گهرج آهي، آرٽيفيشل انٽيليجنس ڏوهن جي نئين چيلنجز کي منهن ڏيڻ ۾ اهم ڪردار ادا ڪندي، هن نظام جي ذريعي پوليس جي مجموعي ڪارڪردگي ۾ اضافو ٿيندو ۽ عوام جو اعتماد بحال ٿيندو. مراد علي شاهه چيو ته هن سان نه رڳو ڏوهن تي ضابطو آڻڻ ۾ مدد ملندي پر ڏوهن جي دنيا سان لاڳاپيل ماڻهن، ٽولن ۽ ڏوهارين کي به ڏوهه ڪرڻ کان اڳ ئي روڪڻ ۾ مدد ملندي. سنڌ جي وڏي وزير چيو ته هن سسٽم کي ڊيزائننگ ۽ لڳائڻ ۾ نيشنل ريڊيو ٽرانسميشن ڪارپوريشن جو اهم ڪردار آهي، هو هن نظام جي ڪاميابي تي سڄي سنڌ پوليس کي مبارڪ پيش ڪن ٿا، اميد آهي ته هن نظام کي ڏوهن خلاف هڪ اثرائتي اوزار طور استعمال ڪري وڌيڪ مضبوط بڻائڻ جي ڪوشش ڪئي ويندي. مراد علي شاهه چيو ته ڏوهاري دٻاءَ جو شڪار ۽ عجيب حرڪتون ڪري رهيا آهن، هو هاڻي کين ڀڄڻ نه ڏيندا، ڪراچيءَ ۾ ڏوهن تي ضابطو آڻڻ لاءِ وڌيڪ قدم کڻڻا پوندا. سنڌ جي وڏي وزير مراد علي شاهه چيو ته گهوٽڪي ۾ پوليس اهلڪارن جي شهادت ۾ ملوث ڌاڙيلن کي ماريو ويو آهي، سانگهڙ ۾ ڏاچيءَ جي ڄنگهه وڍيندڙ سمورا جوابدار گرفتار ڪيا ويا آهن، ڏاچيءَ جي مالڪ کي قتل ڪرڻ جون ڳالهيون غلط آهن، هٿ سان پنهنجي معاشري ۾  بگاڙ پيدا نه ڪرڻ گهرجي.